सुनसरीको इटहरी उपमहानगर प्रमुख द्वारिकलाल चौधरीले मंगलबार इटहरीका पत्रकार विराट अनुपमलाई फोनमा धम्की दिए, ‘तेरो नाकको हड्डी भाँच्न एक करोडको घडेरी राखेको छु ।’ यो धम्कीबारे सञ्चारमाध्यम र सामाजिक सञ्जालहरूमा सार्वजनिक भएपछि न्युज–२४ का पत्रकार रवि लामिछानेले चौधरीलाई टेलिफोन अन्तर्वार्तामा सोधे, ‘मेयरसाब, तपाईंले त पत्रकारको नाकको हड्डी भाँच्न एक करोड छुट्ट्याएको छु भन्नुभएछ नि ? ’

इटहरीका मेयर द्वारिकलाल चौधरी

जबाफमा चौधरीले भने, ‘एक करोड हैन, दस करोड लाग्यो भने पनि सिध्याउँछु, रिस उठ्यो भने ।’

यो त कानुनलाई हातमा लिने काम भएन र भन्ने प्रश्नमा उनको जबाफ छ, ‘पुलिस प्रशासन, अदालतको बाटो म देखाइदिन्छु । लौ मैले धम्की दिएँ, ममाथि कारबाही गर्नुस् । त्यस्ता पत्रकारको अनुहारमा कालोमोसो दल्छु । इटहरीमा यस्तै शासन चल्छ ।’
अन्तर्वार्तामा उनले आफू नेकपा कार्यकर्ता भएको उल्लेख गर्दै भनेका छन्, ‘नेकपाको कार्यकर्ता हो, द्वारिक चौधरी । प्रदेश नं १ को सदस्य । मेरो नेतालाई सुनाइदिनु होला तपाईँको कार्यकर्ता त जब्बर रहेछ । केपी ओलीलाई सुनाइदिनुस् । माधव नेपाललाई सुनाइदिनुस् । प्रचण्डसँग त अस्ति आइरहेछु हात मिलाएर ।’

आमसञ्चार माध्यमबाट कुनै व्यक्तिविशेषलाई तोकेरै सिध्याइदिने खुला धम्की दिइरहेका मेयर चौधरीप्रति पार्टी र राज्य संयन्त्रका तर्फबाट बुधबार बेलुकीसम्म कुनै कारबाही प्रक्रिया अघि बढेको जानकारी छैन । पत्रकार महासंघ सुनसरीको बुधबार बसेको बैठकले आफूहरू असुरक्षित भएको भन्दै पत्रकारलाई पूर्ण रूपमा सुरक्षा अनुभूति नभएसम्म इटहरी उपमहानगरका कुनै पनि कार्यक्रममा सहभागी नहुने निर्णय गरेको छ ।

शाखा अध्यक्ष अमर खड्काले सुनसरीका पत्रकार असुरक्षित भएको ठहर गर्दै जिल्ला प्रहरी र प्रशासनमा ज्ञापनपत्रमार्फत सुरक्षा मागिएको बताए । ‘इटहरी उपमहानगर प्रमुख नेकपाका प्रदेश कमिटी सदस्यसमेत भएकाले नेकपालाई प्रेस जगत्प्रतिको दृष्टिकोण सार्वजनिक गर्न माग गरेका छौं,’ उनले भने ।

पत्रकार महासंघ प्रदेश समितिले विज्ञप्ति जारी गर्दै चौधरीले दिएको धम्की र गालीगलौजले प्रेस तथा अभिव्यक्ति स्वतन्त्रतामाथिको ठाडो हस्तक्षेप हुनुका साथै प्रचलित कानुनको समेत उपहास भएको बताएको छ । प्रमुख चौधरीलाई कारबाहीका साथै प्रेस स्वतन्त्रताको सम्मान एवं पत्रकारलाई निर्बाध र स्वतन्त्र रूपमा काम गर्ने वातावरण बनाउन तीनै तहका सरकारसँग माग गरिएको छ ।

उपमहानगर उपप्रमुख लक्ष्मी गौतमले चौधरीले पत्रकारप्रति गरेको व्यवहार उचित नभएको बताइन् । विगतमा लेखेका समाचारहरूका कारण चौधरी पीडित हुनुपरेकाले आक्रोश जन्मिएको उनको भनाइ छ ।

नेकपाका इटहरी उपमहानगर अध्यक्ष रेवती घिमिरेले सार्वजनिक ओहदामा पुगेपछि त्यसको मर्यादा राख्नु जोसुकैको पदीय दायित्व हुने भन्दै चौधरीले यसमा ध्यान दिनुपर्ने बताए । ‘उपमहानगरजस्तो संस्थाको प्रमुख पदमा निर्वाचित भएर गएको व्यक्तिले कानुनले बन्देज गरेको कार्य गर्नु सर्बथा अनुचित हो,’ उनले भने, ‘उहाँले चलाएको भ्रष्टाचारविरुद्ध, सार्वजनिक सम्पत्तिको संरक्षणलगायतको अभियानको पक्षमा छु । तर त्यो विधि र प्रक्रियाअनुसार चल्नुपर्छ ।’

नेकपा प्रदेश १ अध्यक्ष देवराज घिमिरेले उपमहानगरको प्रमुख पदमा बसेर चौधरीले पत्रकारविरुद्ध गरेको कार्य शोभनीय नभएको बताए । ‘समस्या समाधानको बाटोमा हिँड्नुपर्ने हो,’ उनले भने, ‘समस्या झन् बल्झाएर कसैलाई फाइदा नहुने सबैले बुझ्नु आवश्यक छ ।’

सुनसरीका प्रहरी उपरीक्षक यज्ञविनोद पोखरेलले पत्रकार महासंघले ज्ञापनपत्र बुझाए पनि कसैले उजुरी दर्ता नगरेको उल्लेख गर्दै यसबारे अनुसन्धान भइरहेको उनले जनाए ।

किन आक्रोशित भए चौधरी  ?
नगरमा भएका अनियमितताका विषयलाई समाचारका रूपमा उजागर गर्दा चौधरीले आफूलाई आक्रमणको धम्की दिएको पत्रकार अनुपमले बताए ।

यसअघि अनुपमले फेसबुकमा पोस्ट गरेको साथीहरूसँगको फोटोमा प्रमुख चौधरीले ‘चाटुकार पत्रकार’ भनेर कमेन्ट गरेका थिए । त्यसबारे बुझ्न चौधरीलाई फोन गर्दा उल्टै धम्की दिएको अनुपमले बताए । सीएफएल बल्ब काण्डबारे सामाचार लेखेदेखि प्रमुख चौधरी आफूप्रति पूर्वाग्रही भएको उनको भनाइ छ ।

चौधरीले भने अनुपमलगायत केही पत्रकारले डेढ वर्षदेखि आफ्नो विरोधमा समाचार लेख्नुका साथै सामाजिक सञ्जालमा अनावश्यक कुरा लेखेर बदनाम गर्न खोजेको आरोप लगाए । ‘उनीहरूले केही दलालको पक्षपोषणमा यो मधेसको थारूको छोरालाई कुनै भिजनै छैन, यसले के गर्न सक्छ भन्दै अनेक गलत अफवाह फैलाउँदै आएका छन्,’ उनले भने, ‘जति सम्झाउँदा पनि विरोध गर्न नछाडेको र त्यसमाथि फोन गरेर अभद्र गाली गरेकाले नाकको हड्डी भाँचिदिने भन्न बाध्य भएँ ।’

महासंघद्वारा भर्त्सना
मेयर चौधरीले पत्रकार विराट अनुपमलाई टेलिफोनमा दिएको धम्कीको नेपाल पत्रकार महासंघले भर्त्सना गरेको छ । महासंघले बुधबार विज्ञप्ति जारी गर्दै राज्यको जिम्मेवार निकायमा रहेका चौधरीले खुला रूपमा धम्क्याएर प्रेस तथा अभिव्यक्ति स्वतन्त्रतामाथि हस्तक्षेप र कानुनको उपहास गरेको जनाएको छ ।

महासंघले मेयर चौधरीलाई सार्वजनिक रूपमा माफी मगाई प्रेस स्वतन्त्रताको सम्मान गर्न एवं पत्रकारलाई निर्बाध र स्वतन्त्र रूपमा काम गर्ने वातावरण बनाउन सम्बन्धित निकायको ध्यानाकर्षणसमेतगराएको छ ।

नेकपामा कारबाहीबारे छलफल हुँदै
पत्रकारलाई ज्यान मार्ने धम्की दिएका चौधरीमाथि कस्तो कारबाही गर्ने भन्नेबारे नेकपाभित्र छलफल सुरु भएको छ । चौधरीले पार्टी नीति प्रतिकूल अभिव्यक्ति दिएको भन्दै स्थानीय नेताहरूले केन्द्रमा रिपोर्ट गरेका छन् ।

प्रदेश नम्बर १ का आन्तरिक मामिला मन्त्रीसमेत रहेका नेकपाका केन्द्रीय सदस्य हिक्मत कार्कीले चौधरीको अभिव्यक्तिबारे के गर्ने भनेर पार्टीमा छलफल गरिरहेको जानकारी दिए । ‘यो माथिबाटै टुंगो लाग्ने विषय हो । यहाँको अवस्था हामीले नेताहरूलाई जानकारी गराएका छौं,’ उनले भने ।

अध्यक्षद्वय केपी शर्मा ओली र पुष्पकमल दाहालसमक्ष पनि यो विषयमा ध्यानाकर्षण भइसकेको छ । कार्कीका अनुसार विगतमा यस्तै अभिव्यक्ति दिँदा चौधरीलाई पार्टीकै दबाबमा आत्मालोचना गर्न लगाइएको थियो । ‘अहिले पुनः त्यस्तै व्यवहार देखिएको छ । यो विषयलाई केन्द्रले नै सल्टाउनुपर्ने भएको छ,’ उनले भने ।

पार्टी स्थायी समितिभित्रकै नेताहरूले पनि मेयर चौधरीलाई बुधबार आत्मालोचना गर्न सुझाएका छन् । ‘इटहरीका मेयर चौधरी हक्की हुनुहुन्छ भन्ने उहाँको अभिव्यक्तिबाटै थाहा हुन्छ । तर पार्टीको मान्यताबारे उहाँको बुझाइ त्रुटिपूर्ण छन्,’ प्रदेश नम्बर ५ का मुख्यमन्त्रीसमेत रहेका नेकपा स्थायी समिति सदस्य शंकर पोखरेलले फेसबुकमा लेखेका छन्, ‘नेकपा विधिको शासन र लोकतान्त्रिक मूल्यमान्यताप्रति दृढ छ । जबजबाट दीक्षित कार्यकर्ताले लोकतान्त्रिक मूल्यमान्यता र विधिको शासनप्रति झनै प्रतिबद्ध रहनुपर्छ ।’ पोखरेलले चौधरीको आक्रोश पीतपत्रकारिता र भ्रष्टाचारविरुद्ध भए पनि अभिव्यक्ति अस्वाभाविक र गलत रहेकाले सच्याउँदै आत्मालोचना गर्नॅपर्ने बताएका छन् ।

स्थायी समितिकै अर्का नेता योगेश भट्टराईले पनि चौधरीले पत्रकार र अन्य कतिपय व्यक्तिबारे सार्वजनिक गरेका अभिव्यक्ति उनले धारण गरेको सार्वजनिक पद, प्रतिनिधित्व गरेको पार्टी नेकपा र स्वयंको राजनीतिक उचाइका लागि नसुहाउने खालको रहेको बताएका छन् । ‘आफ्ना भनाइप्रति सार्वजनिक रूपमा आत्मालोचना गरी पदीय गरिमा र पार्टीको प्रतिष्ठाप्रति सचेत रहन उहाँलाई अनुरोध गर्छॅ,’ भट्टराईले फेसबुकमा लेखेका छन् ।