हेटौँडा-१३ बनस्पतिमा रहेको श्री युग चेतना आधारभुत प्राविको आज २३ औँ अभिभावक भेला सम्पन्न भएको छ । विद्यालयका ज्येष्ठ सदस्य तथा १३ नम्बर वडाका वडा सदस्य सन्त बहादुर तितुङको अध्यक्षता तथा १३ नम्बर वडाका वडा अध्यक्ष मनोज कुमार वाइबाको प्रमुख आतिथ्यतामा भेला भएको हो ।

भेलाले अशोक कुमार डिम्डुङको अध्यक्षतामा ९ सदस्यीय विद्यालय व्यवस्थापन समिति समेत गठन गरेको छ । समितिको सदस्यहरुमा सूर्य बहादुर छ्युमी, राम बहादुर योञ्जन, उर्मिला भुलन, पार्वती विक, निर्मला लामा, पदेन सदस्य सन्त बहादुर तितुङ, शिक्षकहरुको तर्फबाट जयन्ति कुमारी पाठक र राजु वर्तौलालाई चयन गरिएको छ । डिम्डुङ सातौँ पटक विद्यालय व्यवस्थापन समितिको अध्यक्षमा चुनिनु भएको हो । वि.सं. २०५३ सालमा स्थापना भएको विद्यालयमा १२५ जना विद्यार्थीहरु अध्ययनरत रहेका छन् ।

निकट भविष्यमै विद्यालयलाई अझै स्तरोन्नति गर्दै लैजाने सोचमा रहेको विद्यालयका प्रअ राजु वर्तौलाले बताउनु भएको छ । युएस आइडीको एनआरईएस परियोजना अन्तर्गत अहिले बन्दै गरेको विद्यालयको १३ कोठे भवन आगामी २०७७ साल वैशाख २१ गते सम्पन्न गरी निर्माण पक्षले विद्यालयलाई हस्तान्तरण गर्ने योजना रहेको समेत उहाँले बताउनु भयो ।