मकवानपुरको भीमफेदी गाउँपालिका वडा नम्बर ६ गढीमा आइतबार दिउँसो भएको सुमो दुर्घटना परी दुई जनाको मृत्यु भएको मकवानपुर प्रहरीले जनाएको छ ।

हेटौंडाबाट भीमफेदीतर्फ जाँदै गरेको ना १ ज ४१०६ नम्बरको दक्षिणकाली सुमो सडकबाट करिब डेढ सय मिटर तल खसेर दुर्घटना हुँदा दुई जनाको घटनास्थलमै मृत्यु भएको जिल्ला प्रहरी कार्यालय मकवानपुरका प्रवक्ता इन्द्रबहादुर रानाले जानकारी दिए ।

उनका अनुसार, मृतकको हाल सनाखत हुन सकेको छैन ।

सोही दुर्घटनामा परी सुमो चालकसहित ६ जना घाइते भएका छन् । उनीहरुको प्राथमिक स्वास्थ्य उपचार केन्द्र भीमफेदीमा उपचार पश्चात थप उपचारको लागि ५ जनालाई हेटौंडा अस्पताल र १ जनालाई चुरेहिल अस्पताल लगिएको मकवानपुर प्रहरीले जनाएको छ ।

उक्त सुमोमा चालकसहित ८ जना सवार थिए । घटनाको विषयमा थप अनुसन्धान भइरहेको मकवानपुर प्रहरीले जनाएको छ ।