स्थानीय तहले कार्य सम्पादन मूल्याङ्कनको आधारमा मकवानपुरको हेटौडा उपमहानगरपालिका प्रथम भएको छ। मकवानपुरका १० वटा स्थानीय तहमध्ये हेटौडा ३७.११ अंकसहित प्रथम भएको हो ।
राष्ट्रिय प्राकृतिक स्रोत तथा वित्त आयोगले फागुन ८ गते मंगलबार सार्वजनिक गरेको कार्यसम्पादन मूल्याङ्कनमा थाहा नगरपालिका दोस्रो स्थानमा रहेको छ । थाहाले ३६.६६ अंक प्राप्त गरेको छ । कार्यसम्पादन मूल्याङकनको सूचकका आधारमा स्थानीय तहमा वित्तिय समानीकरण अनुदानको अंक निर्धारण हुने गर्दछ ।
मकवानपुरका स्थानीय तहमा कार्यसम्पादनमा सबैभन्दा कमजोर बागमती गाउँपालिकाको अंक रहेको छ । बागमतीले कार्यसम्पादन मुल्याङ्कनमा १६।२२ अंक मात्र पाएको छ । आयोगले १७ मध्ये १४ वटा सूचकमा मात्र स्थानीय तहको मूल्याङ्कन गरेको जनाएको छ । कार्यसम्पादन मूल्याङ्कन अनुसार इन्द्रसरोवर गाउँपालिकाले २५.५२ अंक पाएको छ । १४ सूचक मध्ये इन्द्रसरोवरले ८ वटा सूचकमा शुन्य अंक प्राप्त गरेको हो । कैलाशले ५ सूचकमा शुन्यसहित ३२.५२, महनरीले ८ सूचकमा शुन्य अंकसहित २९.८४, भीमफेदीले ६ सूचकमा शुन्य अंकसहित ३१.९१ अंक प्राप्त गरेको छ ।
त्यसैगरी मकवानपुरगढीले ६ वटा सूचकमा शुन्यसहित ३१.९७, बकैयाले १० सूचकमा शुन्यसहित २४.८४ अंक र राक्सिराङले ८ सूचकमा शुन्यसहित २४.२४ अंक प्राप्त गरेको छ । सबैभन्दा कमजोर बागमती गाउँपालिकाको ९ वटा सूचकमा अंक शुन्य प्राप्त गरेको छ । जिल्लाकै उत्कृष्ट हेटौंडा उपमहानगरपालिकाको ५ वटा सूचकमा शुन्य अंक पाएको छ भने दोस्रो थाहा नगरपालिकाको ३ वटा सूचकमा मात्र शुन्य अंक पाएको छ ।
प्रदेश तथा स्थानीय तहको कार्य सम्पादन मूल्याङ्कन कार्यविधि, २०७८ को दफा ७ को अधिनमा रही प्रदेश र स्थानीय तहका लागि निर्धारण गरिएको कार्यसम्पादन सूचकको मूल्याङ्कन गरी अंक प्रदान गरिएको आयोगले जनाएको छ ।