ख्रिष्टयन धर्मालम्बीहरुले भोली शुक्रबार गुड फ्राइडे मनाउँदैछन् । प्रभु यशुलाई क्रुशमा चढाएको दिनको सम्झनामा गुड फ्राइडे मनाइने गरिन्छ ।
मकवानपुरमा पनि गुड फ्राइडेको अवसरमा बिभिन्न कार्यक्रम गरिने भएको छ । मकवानपुर इसाई आवाजले प्रदेश तीनका मुख्य मन्त्री डोरमणि पौडेललाई नागरिक अभिनन्दन गर्ने कार्यक्रम रहेको युनाइटेड गोसपल चर्चका सचिव बीररत्न तामाङले बताए । साथै पाष्टर एशोसियसनले बुद्धचोकमा बिहान रक्तदान कार्यक्रम आयोजना गरेको उनले जानकारी दिए ।
शुक्रबार दिनभर सबै मण्डलीहरुमा गुड फ्राइडेको अवसरमा बिभिन्न कार्यक्रम हुने तामाङले बताए । मकवानपुरमा करिब चारसय मण्डली रहेका छन् ।
ख्रिष्टयन समुदायको प्रमुख तीन चाडमध्ये दोस्रोमा गुड फ्राइडे पर्छ । सम्पूर्ण मानव जातीको पाप बोकेर क्रुशको दर्दनाक मृत्युलाई प्रभु यशुले लिएको सम्झनामा गुड फ्राइडे मनाउने गरिएको बरिष्ठ पास्टर ऋषिराम आचर्याले बताए ।