दाङ–दाङमा एक घरमा भएको आगलागीमा परी एकै परिवारका ३ बालबालिकाको जलेर मृत्यु भएको छ । दाङको बंगलाचुली गाउँपालिका वडा नम्बर ८ गुराँसेका नवराज पुनको घरमा आगो लाग्दा उनका एक छोरा र दुई छोरीको जलेर मृत्यु भएको प्रहरीले जनाएको छ ।

आगलागीमा परी ७ वर्षीय कृष्णबहादुर पुन, ५ वर्षीया अस्मिता पुन र अढाई वर्षकी अन्जु पुनको जलेर मृत्यु भएको प्रहरीले जानकारी दिएको छ।

पुनको एक वर्षीय छोरा बिरामी भएका कारण तीन छोराछोरीलाई घरमा सुताएर नवराजकी श्रीमती झारफुक गराउन गाउँ गएका बेला गए राति ८ बजेतिर आगलागी भएको दाङ जिल्ला प्रहरी कार्यालयका प्रहरी नायब उपरीक्षक रामप्रसाद घर्तीले जानकारी दिए।

नवराज भने घरमा नरहेको बताइएको छ। सोलारको ब्याट्री पड्किएर आगलागी भएको प्रहरीको अनुमान छ। हाँसीपुर प्रहरी चौकी र स्थानीयको सक्रियतामा राति १२ बजे आगो नियन्त्रणमा लिइएको थियो।