हेटौंडा– सन् २०१९ को हेटौंडा जेसीजको अध्यक्षको लागि हालका कानूनी सल्लाहकार सन्देश डिसीले अध्यक्षमा उम्मेदवारी घोषणा गरेका छन् ।

बिहीबार न्युज क्लव मकवानपुरमा पत्रकार सम्मेलनको आयोजना गर्दै डिसी र उनको समूहले उम्मेदवारी घोषणा गरेको हो । पुस १६ र १७ गते हुन लागेको जेसीजको अधिवेशनका लागि उपाध्यक्षमा शिवराम श्रेष्ठ र सरोज सुबेदीलाई उम्मेदवारको रुपमा उभ्याइएको छ । त्यस्तै कार्यकारिणी उपाध्यक्षमा वसन्त कप्रौला र दिपेश जोशीको नाम अघि सारिएको छ ।

अध्यक्षका उम्मेदवार डिसी हेटौंडा जेसीजमा सन् २०११ देखि आवद्ध भएका हुन् । उनी सन् २०१५ मा कार्यकारिणाी उपाध्यक्ष, २०१६ मा महासचिव र २०१७ मा अध्यक्षकै उम्मेदवार बनी पराजित भएका थिए । उम्मेदवारी घोषणा कार्यक्रममा बोल्दै डिसीले आफ्नो एक वर्षे कार्यकालमा हेटौंडालाई वातावरणीय साइकलमैत्री सहर बनाउन विभिन्न काम गर्ने बताए ।

युवाहरुलाई सकारात्मक काम गर्न उत्प्रेरणामुलक कार्यक्रम गर्ने पनि उनले प्रतिवद्धता जनाए । जेसीज सदस्यको स्वास्थ्य सन्तुलित राख्न आर्ट अफ लिभिङको कक्षा दिने, भाषणकला, विपद व्यवस्थापन तालिम दिने तथा युवा फिल्म महोत्वको आयोजना गर्ने पनि उनले बताए । मकवानपुरको पर्यटकीय क्षेत्रको पहिचान गरी पुस्तक तथा विद्युतीय सामाग्री पनि तयार गर्ने उनले सुनाए ।