सशस्त्र प्रहरी बलका संस्थापक सशस्त्र प्रहरी महानिरीक्षक स्व. कृष्णमोहन श्रेष्ठको स्मृतिमा माघ १२ गते सशस्त्र प्रहरी बल, नेपाल गण हेक्वा ललितपुर नम्बर २१ गण खुमलटारमा श्रद्धाञ्जली सभा कार्यक्रमको आयोजना गरिएको छ ।

त्यसअवसरमा प्रहरी महानिरीक्षक सर्वेन्द्र खनालले सशस्त्र प्रहरी सहायक निरीक्षक थमनसिंह राई र प्रहरी सहायक निरीक्षक विनिता थापालाई ‘कृष्णमोहन–नुडुप कार्यदक्षता पुरस्कार’ प्रदान गरे । सोही अवसरमा सशस्त्र प्रहरी महानिरीक्षक शैलेन्द्र खनालले सशस्त्र प्रहरी सहायक निरीक्षक गोविन्द सुवेदीलाई ‘सूर्य रेग्मी उत्कृष्ट अंगरक्षक पुरस्कार’ तथा महेन्द्र भृकुटी माध्यमिक विद्यालय बागडोलमा कक्षा ८ मा अध्ययनरत दुई जना जेहेन्दार विद्यार्थीहरुलाई ‘कृष्णमोहन–नुडुप छात्रवृत्ति’ प्रदान गरे ।

कृष्णमोहन–नुडुप स्मृति प्रतिष्ठानद्वारा आयोजित सो कार्यक्रममा प्रहरी महानिरीक्षक सर्वेन्द्र खनाल तथा सशस्त्र प्रहरी महानिरीक्षक शैलेन्द्र खनालले स्वर्गिय श्रेष्ठ दम्पतीको शालिकमा रिथ चढाई भावपूर्ण श्रद्धाञ्जली अर्पण गरे ।

त्यसैअवसरमा नेपाल प्रहरी तथा सशस्त्र प्रहरी बल नेपालका अवकास प्राप्त महानिरीक्षकहरुले स्व। श्रेष्ठ दम्पतीको शालिकमा पुष्प गुच्छा चढाई भावपूर्ण श्रद्धाञ्जली अर्पण गरे । समारोहमा प्रहरी महानिरीक्षक सर्वेन्द्र खनालले स्व.कृष्णमोहन श्रेष्ठलाई एक कर्तव्य परायण र असल व्यक्तित्व भएको स्मरण गर्दै उनको शालिन व्यवहार, आफु मातहातका कर्मचारीलाई गर्ने व्यवहार र गुनासो व्यवस्थापन गर्ने शैली अनुकरणीय रहेको बताए ।

सो कार्यक्रममा नेपाल प्रहरी तथा सशस्त्र प्रहरी बल नेपालका उच्च अधिकृत लगायत विभिन्न महानुभावहरुको उपस्थिति रहेको थियो ।