बालसन्त स्वामी श्रीनिवास आचार्यलाई विराटनगरमा गोली प्रहार भएको छ । विराटनगर जतुवास्थित श्रीराम जानकी मन्दिरमा आजबाट आयोजना हुने श्रीमदभागवत पुराणमा सहभागि हुन हिजो विराटनगर आईपुग्नु भएका आचार्यलाई गएराति गोली प्रहार भएको हो ।

जतुवास्थित रामजानकी मन्दिर परिसरमै रहेको समयमा गएराति पौने २ बजे उहांमाथि गोली प्रहार भएको स्थानीय महिचन्द यादवले जानकारी दिनुभयो । उहाँको दाहिने कुममा गोली लागेको छ ।

गोली प्रहारबाट गम्भीर घाइते हुनुभएका श्रीनिवास आचार्यको स्थानिय न्यूरो अस्पतालमा उपचार भइरहेको छ । घटनास्थलमा गोलीका दुइवटा खोका भेटिएको मोरङ प्रहरीका एसपी अरुणकुमार बिसीले जानकारी दिनुभयो ।

उहांले गोली प्रहार गर्ने अज्ञात समूहको खोजी कार्य भइरहेको बताउनुभयो । गोली प्रहार भएको घटनास्थलमा चेतावनीयुक्त पर्चा समेत भेटिएकोछ । श्रीनिवास आचार्य हिन्दुराज्य स्थापनार्थ अभियान चलाउदै आउनुभएको छ ।