नेपाली राष्ट्रिय फुटबल टिमका गोलरक्षक किरण चेम्जोङ र मालदिभ्सको टीसी स्पोर्टससँगको सम्झौता रद्द भएको छ ।

दोस्रो सिजन माल्दिभ्सको लिग खेल्ने तयारीमा रहेको किरणसँगको सम्झौता क्लबले रद्द गरेको हो । नेपालले मलेसियाविरुद्धको मैत्रीपूर्ण खेलका लागि किरणले जाने निधो गरेपछि क्लवले उनको सम्झौता तोडेको हो ।

किरण र टीसी स्पोर्टसबीच मौखीक रुपमा सहमति भएपछि आधिकारीक रुपमा कागजी प्रक्रिया हुन बाँकी थियो । जसका लागि किरणले क्लबलाई सबै पत्र पठाएका थिए । यही समयमा राष्ट्रिय टिमले मैत्रीपूर्ण खेल खेल्ने भएकाले किरणले राष्ट्रिय टिम रोजेका थिए । तर यता क्लबले आफ्नो अनुमतिबिना नै राष्ट्रिय टिमका लागि खेल्ने निधो गरेको भन्दै सम्झौता रोकेको हो ।

फिफाको मान्यता रहेको मैत्रीपूर्ण खेलका लागि क्लबले ४८ घण्टा अगाडि खेलाडीलाई रिलिज गर्नुपर्ने नियम छ । तर क्लबले भने किरणलाई रिलिज नगर्ने जस्तो देखिनु र किरणले राष्ट्रिय टिमलाई पहिलो रोजाइमा राखेपछि त्यसको असर उनको सम्झौतामा परेको हो ।

अघिल्लो सिजन उत्कृष्ट प्रर्दशन गरेका कारण टीसी स्पोर्टसले किरणलाई दोस्रो सिजनपनि सम्झौता गर्ने निर्णय गरेको थियो । नेपालले जुन दुई र ६ तारिखमा दुई वटा मैत्रीपूर्ण खेल खेल्दैछ । जसका लागि नेपाली टिम आज मलेसिया जाँदैछ ।