गोरखाको प्रहरीले पहरोमा लुकाइराखेको अवस्थामा १६ किलोग्राम सुन बरामद गरेको छ।

धार्चे गाउँपालिका -३ खोर्लाबेशी बजारभन्दा एक किमीमाथि पहरोमा बोराभित्र लुकाइराखेको अवस्थामा प्रहरी चौकी माछिखोलाबाट खटिएको टोलीले बिहीबार बिहान सुन बरामद गरेको हो।

चुमनुब्री गाउँपालिकाका धनकमल गुरुङलाई पक्राउ गरेपछि उनले नै पहरोमा लुकाइराखेको सुन देखाएका थिए।

गुरुङ भरिया मात्रै हुन् वा सुन तस्कर भन्ने खुलेको छैन। तिब्बतबाट भारतीय बजार लैजानका लागि सुन पहरोमा राखिएको हुनसक्ने प्रहरीको अनुमान छ।

बरामद गरिएको सुन र गुरुङलाई माछीखोला प्रहरीले जिल्ला प्रहरी कार्यालय गोरखा पठाएको छ।