चलचित्र पत्रकारिता दिवसको अवसर पारेर चलचित्र पत्रकार संघ मकवानपुरले दुई पत्रकार सहित चार जनालाई सोमबार सम्मान गरेको छ ।

हेटौँडामा एक कार्यक्रमको आयोजना गरि संघले चार जनालाई सम्मान गरेको हो । सो अवसरमा राष्ट्रिय चलचित्र पत्रकारिता पुरस्कार बाट राजधानी दैनिकका डब्बु क्षेत्रीलाई सम्मान गरिएको हो । क्षेत्रीलाई नगद ११ हजार १ सय ११ रुपैँया सहित सम्मान गरिएको हो । त्यसैगरि जनता टेलिभिजनका पत्रकार रामकुमार एलनलाई चलचित्र पत्रकारिता पुरस्कारबाट सम्मानित गरिएको छ ।

मकवानपुरमा स्थायी घर भएर नेपाली चलचित्रमा योगदान दिएको भन्दै कलाकारहरु शुसान्त श्रेष्ठ तथा नीता ढुंगानालाई सम्मानित गरिएको छ । सम्मानित हुनेहरुलाई प्रदेश नंबर ३ का प्रमुख प्रतिपक्ष दलका नेता इन्द्रबहादुर बानीया, चलचित्र पत्रकार संघका पुर्व केन्द्रीय अध्यक्ष शान्तिप्रीय, नेपाल चलचित्र विकास बोर्डका केन्द्रीय सदस्य नरेन्द्र महर्जन लगाएतको अतिथिहरुले संयुक्त रुपमा सम्मानित गरेका हुन् । कार्यक्रम चलचित्र पत्रकार संघ मकवानपुरका अध्यक्ष मणीराज गौतमको अध्यक्षतामा भएको थियो ।