मकवानपुरको बकैया गाउँपालिकाले आगामी आर्थिक वर्षभित्र सबै वडा कार्यालय भवनको निर्माण कार्य पूरा गर्ने भएको छ । बकैया गाउँपालिकाका १२ वटा वडा मध्ये ४ र ९ नम्बर वडा साविकका गाविस भवनमा सञ्चालित रहेको गाउँपालिका अध्यक्ष खनालले जानकारी दिएको छ । बकैया ९ नम्बर वडाको पनि नयाँ भवन निर्माण कार्य सुरु भइसकेको छ । नयाँ भवन बनेर ११ नम्बर वडा कार्यालय नयाँ भवनमा सरिसकेको छ भने वडा नम्बर ६ र ८ को भवन निर्माण सकिएको कार्यालय सर्न बाँकी रहेको उनले जानकारी दिए । वडा नम्बर १ झ्याल ढोका हाल्न र रंग लगाउन बाँकी रहेको उनको भनाई छ ।

वडा नम्बर ३, ५ र १० को भवनको ढलान भइसकेको छ । त्यस्तै ७ नम्बर वडा कार्यालयको सिलान्यास भइसकेको छ । गाउँपालिकाले भवन निर्माणको लागि एउटा वडा कार्यालयलाई ३६ लाखको बजेट छुट्याइएको खनालले बताए । आगामी आर्थिक वर्षभित्र पालिकाका सबै वडा कार्यालय व्यवस्थित बनाएर पालिकावासीलाई सहज रुपमा सेवा, सुविधा प्रदान गरिने अध्यक्ष खनालले बताउनुभयो ।