हेटौंडा–पूर्वपश्चिम राजमार्गअन्तर्गत मकवानपुरको मनहरीमा गए राती राती भएको दुई छुट्टाछुछ्रटै दूर्घटनामा एक जनाको मृत्यु भएको छ भने एक जना गम्भीर घाइते भएका छन् ।

शनिबार साँझ हेटौंडाबाट चितवनतर्फ जाँदै गरेको बा ७५ प १६१४ नम्बरको मोटरसाइकलले मनहरी–९ स्थित ज्यामिरेमा पैदलयात्रुलाई ठक्कर दिँदा एक जनाको मृत्यु भएको हो ।

मोटरसाइकलको ठक्करबाट गम्भीर घाइते भएका हेटौंडा–११ नवलपुर घर भई ज्यामिरेस्थित गुम्बामा काम गर्ने ५५ वर्षीय प्रेम लामाको उपचारको क्रममा चितवनको भरतपुर अस्पतालमा राती नै मृत्यु भएको हो ।

 त्यस्तै गए राती नै मनहरी–७ रमनटारमा ना ८ ख ११ नम्बरको बसले मोटरसाइकललाई ठक्कर दिँदा सोही ठाउँका सञ्जोक कालाखेती गम्भीर घाइते भएका छन् ।

ना ४२ प ५२२५ नम्बरको मोटरसाइकलमा सवार कालाखेतीलाई विपरित दिशाबाट आइरहेको बसले ठक्कर दिएको थियो । कालाखेतीको भरतपुर अस्पतालमा उपचार भइरहेको प्रहरीले जनाएको छ ।