नेपाल आर्मी क्लबले मध्यपुर युथ एसोसिएसन थिमीमाथि सहज जित हात पारेको छ । पूर्वी मकवानपुरको बाग्मतीमा जारी दोस्रो राष्ट्रिय बागमती गोल्डकप फुटबल प्रतियोगितामा ३–० गोल अन्तरले मध्यपुरलाई पछि पार्दै आर्मीले अन्तिम आठमा स्थान सुरक्षित गरेको हो ।
खेलकुद विकास समिति बागमती गाउँपालिकाको आयोजनामा जारी प्रतियोगितामा आर्मीले सेमिफाइनल प्रवेशका लागि बीएफसी चितवनसँगको भेट पक्का गरेको हो । बागमती गाउँपालिकास्थित फापरबारीको जनता माध्यमिक विद्यालयको मैदानमा जारी प्रतियोगिताको खेलभर आर्मी मध्यपुरमाथि हावी भयो । पहिलो हाफ् गोलरहित बराबरीमा टुंगिएपनि अधिकांश समय बल आफ्नो नियन्त्रणमा राखेको थियो ।
आर्मीका लागि खेलको ६१ औं मिनेटमा सन्तोष केसीले गोल गरे । आर्मीका अनिश शाक्यले ७६ औं मिनेटमा गोल गर्दै खेलमा अग्रतालाई दोब्बर पारे । खेलको ८३ औं मिनेटमा गआर्मीका सञ्जिव मोक्तानले गोल गर्दै जित सुनिश्चित पारे । खेलमा आर्मीका सन्तोष केसी म्यान अफ दी म्याच घोषित भए ।
आर्मीबाट राष्ट्रिय टोलीबाट प्रतिनिधित्व गरिसकेका खेलाडीहरुको खेलमा उपस्थिति थिएन । आर्मीका स्टार खेलाडी नवयुग श्रेष्ठ, भरत खवास, जर्जप्रिन्स कार्कीको खेल हेर्नका लागि मैदानमा आएका दर्शकहरु उनीहरु विनाको दोस्रो टोली मैदानमा उत्रिएपछि निराश भएर फर्किएका थिए ।
प्रतियोगिताअन्तर्गत् सोमबार सरस्वती युवा क्लब काठमाडौं र नवजनजागृती युवा क्लब सिमराबीच खेल हुने आयोजकले जनाएको छ ।