हेटौंडा–हेटौंडामा सोमबारबाट सुरु भएको साहाना प्रधान स्मृति महिला राष्ट्रिय हक्की प्रतियोगितामा नेपाल आर्मी र प्रदेश नम्बर ३ ले विजय यात्रा सुरु गरेको छ ।

उद्घाटन खेलमा आर्मीले प्रदेश नम्बर १ लाई ६–० को भारी गोल अन्तरले हराउँदै विजय यात्रा सुरु गरेको हो । त्यसैगरी प्रदेश नम्बर ३ ले प्रदेश २ लाई २–० गोल अन्तरले हराएको छ । प्रदेश ३ को तर्फबाट निलिमा पाण्डेले २ गोल गरेकी हुन् । प्रतियोगिताको उद्घाटन प्रदेश नम्बर ३ का प्रदेशसभा सदस्य मुनु सिग्देलले गरेकी हुन् ।

यही माघ ११ गतेसम्म सञ्चालन हुने प्रतियोगितामा ६ वटा टिमको सहभागिता रहेको छ । हेटौंडा ११ थानाभ¥याङमा रहेको दंगा प्रहरी नियन्त्रण गणको खेल मैदान प्रतियोगिता सञ्चालन भैरहेको छ । प्रतियोगिता अन्तर्गत मंगलबार प्रदेश नम्बर १ र ७ तथा प्रदेश २ र ४ को बीचमा खेल हुने आयोजकले जानकारी दिएको छ ।

मकवानपुर जिल्ला हक्की संघका अध्यक्ष प्रतापसिंह क्षेत्रीको अध्यक्षतामा भएको उद्घाटन समारोहमा हक्की संघका केन्द्रीय सचिव रञ्जन थापा, मकवानपुर जिल्ला खेलकुद विकास समितिका अध्यक्ष माधव तिमल्सिनालगायतले शुभकामना मन्तव्य व्यक्त गरेका थिए ।