हेटौंडा मकवानपुर उपमहानगरपालिका वडा नं १० स्थित टेम्पु पार्कबाट सटर फोडी चोरी गर्ने २ जनालाई प्रहरीले पक्राउ गरेको छ । पक्राउ पर्नेहरुमा हेटौंडा उपमहानगपालिका वडा नं. १० का २३ वर्षिय राजिब गुरुङ र २४ वर्षिय सरिन केसी रहेका छन् ।

जिल्ला प्रहरी कार्यालय मकवानपुरबाट खटिएको प्रहरी निरिक्षक मधु कुमार थापाको टोलीले विशेष सुचनाको आधारमा उनीहरुलाई बिहिबार दिउँसो ३ बजेको अन्तरालमा पक्रेका हुन् ।

उनीहरुलाई गत माघ ८ गते राति (बुधबार) सोही नगरपालिका–१०, टिसियन रोडका राजु मोक्तानको डाँफे कोल्ड स्टोर्सको सटर तोडी चोरी भएको अभियोगमा पक्राउ गरेको जिल्ला प्रहरी कार्यालय मकवानपुरले जनाएको छ ।

चोरीको सामानहरुमा प्रहरीले गुरुङसंग रु ५० को एनटिसी को रिचार्ज कार्ड ४० थान, रु ५० को एनसियलको रिचार्ज कार्ड ३२ थान, नगद रु ५२० र केसीको साथबाट नगद रु १४३०, खुकुरी चुरोटको बट्टा १ थान समेत फेला पारेका छन् ।

प्रहरीले केसीको घरमा गइ खनतलासी गर्दा मदिरा, चुरोटलगायत सामानहरु बरामद गरिएको र उनीहरुलाई पक्राउ गरी आवश्यक अनुसन्धान भइरहेको जिल्ला प्रहरी कार्यालय मकवानपुरले जनाएको छ ।