हेटौंडा/मकवानपुरको हेटौंडा उपमहानगरपालिका वडा नम्बर–१० स्थित टेम्पु पार्कबाट प्रहरीले सटर फोडेर चोरी गर्ने दुईजना पक्राउ गरेको छ ।

पक्राउ पर्नेहरुमा हेटौंडा उपमहानगपालिका वडा नम्बर–१० का २३ वर्षीय राजिब गुरुङ र २४ बर्षीयसरिन केसी रहेका छन् । जिल्ला प्रहरी कार्यालय मकवानपुरबाट खटिएको प्रहरी निरीक्षक मधु कुमार थापाको टोलीले विशेष सूचनाको आधारमा उनीहरुलाई बिहीबार दिउँसो ३ बजेको समयमा पक्राउ गरेको हो ।

उनीहरुलाई बुधबार रातिसोही नगरपालिका–१०, टीसीएन रोडका राजु मोक्तानको डाँफे कोल्ड स्टोर्सको सटर तोडी चोरी भएको अभियोगमा पक्राउ गरेको जिल्ला प्रहरी कार्यालय मकवानपुरले जनाएको छ । प्रहरीले गुरुङको साथबाट ५० रुपियाँको एनटिसी को रिचार्ज कार्ड ४० थान, ५० रुपियाँको एनसेलको रिचार्ज कार्ड ३२ थान, नगद पाँचसय २० रुपियाँ र केसीको साथबाट नगद एकहजार चारसय ३० रुपियाँ, खुकुरी चुरोटको बट्टा १ थान समेत फेला परेको थियो ।

केसीको घरमा खानतलासी गर्दा मदिरा, चुरोटलगायत सामानहरु बरामद गरिएको हो । उनीहरुलाई पक्राउ गरी आवश्यक अनुसन्धान भइरहेको जिल्ला प्रहरी कार्यालय मकवानपुरले जनाएको छ ।