विश्व क्रिकेटका फिल्डिङ हस्ती दक्षिण अफ्रिकाका जोन्टी रोड्स रुस्लान धनगढी प्रिमियर लिग (डीपीएल) को तेस्रो संस्करणको गुडविल एम्बासडर बनेका छन् । माघ २६ देखि धनगढीमा हुने प्रतियोगितामा रोड्सलाई सद्भावना दूत बनाएको डीपीएल आयोजक धनगढी क्रिकेट एकेडेमीले मंगलबार घोषणा गरेको हो ।

डीसीएका अनुसार रोड्स डीपीएल अवधिभर धनगढीमै रहनेछन् । उनी प्रतियोगिताभर विभिन्न कार्यक्रममा संलग्न हुनेछन् । ५२ टेस्ट र २ सय ४५ एकदिवसीय खेलेका ४९ वर्षीय रोड्स उत्कृष्ट फिल्डिङका लागि परिचित छन् ।

उनी यसअघि पनि दुईपल्ट नेपाल आइसकेका छन् । इन्डियन प्रिमियर लिगमा ९ वर्षसम्म मुम्बई इन्डियन्सका सहायक र फिल्डिङ प्रशिक्षक रहेका रोड्स स्पोर्टस एड र नेपाल क्रिकेट स्कुलको प्रयासमा नोभेम्बरमा नेपाली युवा खेलाडीलाई प्रशिक्षण दिन नेपाल आएका थिए ।