बलान बिहुल गाउँपालिका–४, बेल्हीकी १६ वर्षीया सरिताकुमारी बडहीको अर्धनग्न शव चोटपटक लागेको अवस्थामा गत सोमबार राति घरमा शव फेला परेपछि प्रहरीले हत्या आशङ्कामा उनका बुबालाई ४५ वर्षीय तुरुन्तलाल बडहीलाई पक्राउ गरेको हो ।

मृतककी आमासमेत फरार रहेकाले घटना थप शङ्कास्पद भएको र उनको खोजीको क्रम जारी भइरहेको इलाका प्रहरी कार्यालय कडरबोनाले जानकारी दिएको छ ।

प्रहरीका अनुसार भारतमा विवाहिता दिदीका देवरसँग प्रेममा परेकी सरिताले घरपरिवारले मञ्जुरी नदिए पनि प्रेमीसँगै विवाह गर्ने अडान लिएपछि आफूहरूले सरितालाई कुटपिट गरेको बुबा बडहीले बताएका छन् ।

शव परीक्षणका लागि मङ्गलबार धरानस्थित बिपी कोइराला स्वास्थ्य विज्ञान प्रतिष्ठानमा पठाईएको प्रहरीले जनाएको छ ।