विभिन्न क्षेत्रमा भएको आगलागीबाट धनजनको क्षती भएको छ । काठमाडौं, महोत्तरी, सप्तरी र धनुषाका विभिन्न स्थानमा भएका छुट्टाछुट्टै क्षेत्रमा भएको आगलागीबाट करिब ८ लाख ९४ हजार रुपैयाँ बराबरको धनमाल जलेर नष्ट भएको हो ।

महोत्तरी, लोहारपट्टी नगरपालिका–४, मुसरी टोल बस्ने ३५ वर्षीय शुशिल रामको १ तले कच्ची घरमा करेन्ट सर्ट भई बुधबार दिउँसो आगलागी हुँदा घर पूर्णरुपमा जलेर करिब १ लाख ६३ हजार रुपैयाँ बराबरको धनमाल नष्ट भएको छ ।

काठमाडौं दक्षिणकाली नगरपालिका–६, दक्षिणकाली गेट नजिक बस्ने ४० वर्षीय किरणकुमार रंजितले आफ्नो घर अगाडि पार्किङ गरी राखेको बा.९८ प ६५७८ नम्बरको स्कुटीमा बिहीबार बिहान आगलागी हुँदा जलेर क्षति भएको छ । घटनामा शंकास्पद रहेका एकजनालाई प्रहरीले अनुसन्धानको लागि नियन्त्रणमा लिएको छ ।

सप्तरी राजबिराज नगरपालिका–९, कोलठ्ठा बस्ने मुलुकी यादवको परालको टालमा बुधबार दिउँसो आगलागी भई उक्त आगो फैलिएर यादव सहित ४ जनाको २० वटा परालको टाल पूर्णरूपमा जलेर करिब ४ लाख रुपैयाँ बराबरको धनमाल नष्ट भएको छ ।

यसैगरी सप्तरी, सप्तकोशी नगरपालिका–२ बस्ने दिनेस डोटेलको गोठमा बालेको घुरबाट आगो सल्कन गई बुधबार साँझ आगलागी हुँदा गोठ पूर्णरूपमा जलेर करिब १ लाख १० हजार रुपैयाँ बराबरको धनमाल नष्ट भएको छ ।

यसैगरी धनुषा, लक्ष्मिनियाँ गाउँपालिका–२ बस्ने जिवछ रामको काठको कटघेरामा संचालित किराना पसलमा बिहीबार बिहान आगलागी हुँदा पसल पूर्णरूपमा जलेर करिब २ लाख ११ हजार रुपैयाँ बराबरको धनमाल नष्ट भएको छ ।

स्थानीयबासीको सहयोगमा सबै आगलागी नियन्त्रणमा लिनुको साथै यस सम्बन्धमा थप अनुसन्धान भइरहेको स्थानिय प्रहरीले जनाएको छ ।