शिक्षकको कुटपिटबाट एक विद्यार्थी गम्भीर घाईते भएको छ । कुमाख गाउँपालिका–२ रुमालको नारायण माध्यमिक विद्यालयका कक्षा १० मा अध्यानरत एक छात्र शिक्षकको कुटपिटबाट गम्भीर घाइते हो ।

आसन्न एसईईको तयारीमा जुटेका विद्यार्थी राजु हमाललाई बुधबार कोठामै गएर शिक्षक हिम बहादुर बुढाले बाँसको लठ्ठीले कुटेको हमालका बुबा गणेश हमालले बताए ।

‘कक्षा १० को टिउसन पढेर विद्यार्थीहरु घर फर्किएपछि विद्यालयको कक्षाकोठा बन्दगर्ने क्रममा शिक्षक भित्रै थुनिएका रहेछन्,’ रावतले भने ‘अन्तिममा रहेका विद्यार्थी राजु हमालले शिक्षक भित्र छन् भन्ने थाहा नपाएर ढोका बन्दगरी कोठा तिर लागेछन् ।

रिसको झोकमा शिक्षकले विद्यार्थीलाई कुटेको थाहा पाएँ ।’ घाइते विद्यार्थीको स्थानीय स्वास्थ्य चौकीमा उपचारपछि थप उपचारको लागि परिवारले बाहिर लैजाने तयारी गरिरहेको प्रहरीले जनाएको छ ।

विद्यार्थी माथि कुटपिट गर्ने शिक्षकलाई अस्थाई प्रहरी पोष्ट नेटाले नियन्त्रणमा लिएको जिल्ला प्रहरी कार्यालय सल्यानले जनाएको छ । घटनाको बारेमा थप अनुसन्धान भइरहेको प्रहरीले जनाएको छ ।