जिप दुर्घटना हुँदा २ जनाको मृत्यु भएको छ भने दुर्घटनामा दुई जना घाइते भएका छन् । आईतबार दिउँसो मुसिकोट नगरपालिका–८, वामी मैदानमा ग १ च ८३५७ नम्बरको गाडी दुर्घटना हुँदा गाडीको मालिक मुसीकोट नगरपालिका ८ का ३० वर्षीय ठाकुर सापकोटा र सोही ठाउँकी ५५ वर्षीया पुतलीसिंह ठकुरीको मृत्यु भएको हो ।

दुर्घटना परी मुसीकोट नगरपालिका–८ का ५५ वर्षीया हरिकला कार्की र बाग्लुङ दगातुमडाडा घर भई वामी मैदानमा दिदी भेट्न आएका १४ वर्षीय कमल कार्की घाइते भएका छन् । उनीहरुलाई वामी मैदानस्थित शहरी स्वास्थ्य केन्द्रमा प्राथमिक उपचार गरी थप उपचारको लागि पाल्पा पठाइएको प्रहरीले जनाएको छ ।

वामी मैदानबाट वामीटक्सार जाने क्रममा उक्त गाडी मैदान चौपारीबाट करिब १५० मिटर तल खसेको प्रहरीले जनाएको छ ।