३ नम्बर प्रदेशका मुख्यमन्त्री डोरमणि पौडेलले राजनीति पैसा कमाउने थलो नभएको बताउनुभएको छ ।

केही जनप्रतिनिधि ठेकेदारको रुपमा प्रस्तुत भएको गुनासो आएको भन्दै उहाँले यस्तो बताउनु भएको हो । सोमबार नुवाकोटमा आयोजित नेपाल कम्युनिस्ट पार्टी (नेकपा ) को आयोजनामा भएको कार्यकर्ता भेटघाट कार्यक्रममा बोल्दै मुख्यमन्त्री पौडेलले भन्नुभयो -” पैसा कमाउने भए ब्यापार गर्नुस राजनीति हैन।” राजनीति नितान्त सेवा गर्नका लागि भएको उहाँको भनाई थियो ।

मुख्यमन्त्री पौडेलले तीनै तहको सरकारको समन्वय भए मात्र गन्तव्यको यात्रा तय गर्न सकिने बताउनुभयो । सडक संजाललाई गाउँपालिका केन्द्रसंग जोड्ने कार्यलाई पहिलो प्राथमिकता दिनु पर्ने उल्लेख गर्नु भयो । सरकारले अब ४ बर्षमा गाउँ पालिकामा जाने सडक कालोपत्रे हुने बताउनु भयो । उहाँले समन्वय अभावमा राज्यले प्राथमिकतामा राखेको योजनामा प्रस्तावहरु नआउने तर प्राथमिकतामा नपरेका योजनाहरुका मात्र प्रस्तावहरु आउने समस्या उत्पन्न हुन्छ भन्दै पौडेलले देश र ठाउँ परिवर्तन गर्न सक्ने योजानाहरुलाई प्राथमिकतामा राख्न अनुरोध गर्नुभयो ।

पौडेलले अब पनि निर्वाहमुखी र कामचलाउ योजनालाई प्राथमिकता नदिएर जनताले परिबर्तन को अनुभुती गर्ने गरी काम गर्नु पर्ने धारण राख्नु भयो ।” हाम्रा योजनाहरु दिगो बिकासका लक्ष्यलाई पुरा गर्ने तर्फ लक्षित हुनुपर्छ”- उहाँले भन्नुभयो । हाम्रो अघिल्लो पुस्ताले ६० बर्षको ईतिहासमा देखाउने काम गर्न नसकेको बताउदै पौडेलले सामाजिक, आर्थिक, सास्कृतिक रुपान्तरणका दिशामा अगाडि जान बिगतको मोडल नभएर दीर्घकालीन रुपमा लैजाने गरि नयाँ तौर तरिका अबलम्बन गर्नुपर्नेमा जोड दिनु भयो ।

मुख्यमन्त्री पौडेलले सिङो मुलुक परिबर्तन गर्ने लक्ष्य पूरा गर्न धेरै वाधा र अड्चन आएका छ्न भन्दै प्रदेश सरकार मुलुक परीबर्तन गर्न लागि परेको उल्लेख गर्नुभयो । पौडेलले हरेक स्थानीय तहमा प्राविधिक शिक्षालय, उद्योग ग्राम स्थापना गर्ने सरकार को योजना कार्यन्वनमा लैजाने बताउनु भयो ।

उहाँले नुवाकोटमा भएका सम्भावनाहरुको खोजी गरेर ती स्रोतहरुको परिचालन गर्नु पर्ने धारणा राख्नुभयो । बिगतमा काखमा भएको स्रोत परिचालन गर्न नसकिएको स्मरण गर्दै पौडेलले अब तीनको प्रयोग गर्नुपर्ने बताउनु भयो ।