हेटौंडा– मकवानपुर उद्योग वाणिज्य संघद्वारा सञ्चालित राष्ट्रिय औद्योगिक व्यापार मेलामा सञ्चालन भैरहेको हेटौंडा आइडलमा आइतबार उत्कृष्ट ७ जनाको छनौट भएको छ ।

दर्शकको भोटिङ र निर्णायकको निर्णयको आधारमा आसुतोष पोखरेल, विनायक विडारी र सुविन विश्वकर्मा बाहिरिएका छन् । आइडलमा अब सुसन शाह ठकुरी, प्रेम बैठा, विजय लामा, सुसाल तामाङ, दीपक कालिराज, भुवन घलान र पारु महरा बाँकी रहेका छन् ।

जिपिएक्स रेसिङले प्रायोजन गरेको आइडलमा प्रथम हुनेले नगद ३५ हजार र पाँच हजार बराबरको चन्द्रगिरी केबलकारको टिकट प्राप्त गर्नेछ । यस्तै दोस्रो हुनेले नगद २५ हजार र पाँच हजार बराबरको चन्द्रगिरी केबलकारको टिकट एवम् तेस्रो हुनेले नगद १५ हजार तथा पाँच हजार बराबरको चन्द्रगिरी केबलकारको टिकट प्राप्त गर्नेछन् ।

प्रथम हुनेलाई अन्य विभिन्न पुरस्कारको व्यवस्था समेत रहेको छ । आइडललाई वोन ट्राभल्सको तर्फबाट युएई (दुवई) आउने जाने टिकटको व्यवस्था समेत रहेको आयोजकले जानकारी दिएको छ । आइतबार सिङगर अफ द डेको उपाधि सुसन शाह ठकुरीले पाए ।

गायन प्रतिभाको खोजी गर्ने उद्देश्यले आयोजित हेटौंडा आइडलमा गायक तथा संगीतकारत्रय शिखर सन्तोष, विजय कार्की र किशोर डंगोलले निर्णायकको भूमिका निर्वाह गरिरहेका छन् ।