हेटौंडा–मकवानपुरको थाहा नगरपालिकास्थित दामनमा ट्रकमा अज्ञात समूहले आगजनी गरेको छ ।

राती करिब एक बजेको समयमा काठमाडौंबाट हेटौंडातर्फ आइरहेको ना ५ ख ७४११ नम्बर ट्रकमा अज्ञात समूहले आगजनी गरेको हो । पालुङ र दामनको जंगलबीचमा ट्रकलाई रोकी घरेलु हतियार देखाएर ४–५ जनाको समूहले पेट्रोल खन्याएर अगजनी गरेको चालकलाई उदृत गर्दै प्रहरीले जनाएको छ ।

ट्रकमा चालक, सहचालकसहित ३ जना सवार थिए । सो समूहले ३ जनालाई ट्रकबाट ओरालेर आगो लगाई फरार भएको पाइएको पालुङस्थित ट्राफिक प्रहरी जवान प्रकाश न्यौपानेले जानकारी दिए ।

अगजनीबाट ट्रकको टेलरमा क्षति भएको छ । विप्लव नेतृत्वको नेकपाले आज नेपाल बन्दको आह्वान गरेको कारण उनीहरुले नै त्रास सिर्जना गराउन आगजनी गरेको हुनसक्ने प्रहरीले अनुमान गरेको छ ।

विप्लवले आह्वान गरेको बन्दको कारण आज बिहानैदेखि राजमार्गमा सवारी ठप्प भएका छन् । फाट्टफुट्ट मात्र सवारी चलेका छन् ।

हेर्नुहोस् विप्लवको नेपाल बन्द आह्वानको विज्ञप्ति