हेटौंडा– चैत्र ७ गतेबाट सुरु भएको दोस्रो संस्करणको सहीद स्मृति मकवानपुर गोल्डकप फुटबल प्रतियोगिताको फाइनल भिडन्त आज शनिबार हुँदैछ ।

मकवानपुर जिल्ला फुटबल संघको आयोजनामा सञ्चालन भैरहेको प्रतियोगिताको उपाधि भिडन्तमा घरेलु टोली मकवानपुर–११ र क्यामरुनको दाफिन्स क्लव रहेको छ । दुवै टिमले उपाधि जित्ने दावी गरेका छन् । मकवानपुर–११ ले नेपाल पुलिस क्लवलाई र दाफिन्सले थ्रीस्टार क्लवलाई हराउँदै उपाधि भिडन्त पक्का गरेको हो ।

मकवानपुर–११ का प्रशिक्षक विजयलाल श्रेष्ठले उपाधि मकवानपुरमै राख्नेमा आफू विश्वस्त रहेको बताए । दाफिन्सका खेलाडी फिजिकल रुपमा बलियो रहेको प्रतिक्रिया दिँदै उनले आफ्ना खेलाडी पनि कमजोर भने नरहेको दावी गरे । यस्तै मकवानपुर–११ का कप्तान अशोक बरालले आफ्नो टिमको राम्रो प्रश्तुती हुने दावी गरे ।

यता दाफिन्सका टिम म्यानेजर आशिक थापा मगरले जित्नैको लागि खेल्न आएको प्रतिक्रिया दिए । आफ्ना खेलाडीमा केही दम्भ बढ्दै गएको उनले स्वीकार गरे । टिम कप्तान जो एंगोलाले उपाधि भिडन्तलाई सहज नलिएको प्रतिक्रिया दिँदै उपाधि जित्नेमा भने ढुक्क रहेको बताए ।

प्रतियोगिताको विजेताले नगद ८ लाख र उपविजेताले ४ लाख रुपैयाँ प्राप्त गर्नेछ भने विधागत उत्कृष्ट खेलाडीलाई समेत नगद पुरस्कारको व्यवस्था छ ।