बिहीबार राति आगलागी हुँदा ४ जना घाइते भएका छन् भने एक जनाको मृत्यु भएको छ ।

काठमाडौंको लाजिम्पाटमा आगलागीमा परी ओखलढुंगाको पोखरी गाउँपालिका. २ का भेषबहादुर थापाको मृत्यु भएको हो । उनी ग्रुप फोर सेक्यूरिटी कम्पनी अन्तरगत होटल शंकरमा सुरक्षागार्ड थिए ।

नील सरस्वती मार्गमा रहेको धर्म महर्जनको ३ तले घरमा आगलागी हुँदा भाडामा बसेका उनको मृत्यु भएको हो । उनलाई उपचारका लागि अस्पताल लगिए पनि बाटैमा मृत्यु भएको हो ।

घटनामा घाइते हुने अन्यमा बर्दियाका विबेक शाही, उनकी श्रीमती गंगामाया शाहीसँगै चन्द्रमाया राई र बिना बस्नेत रहेको काठमाडौं प्रहरी परिसर, टेकुका प्रहरी नायव उपरीक्षक (डीएसपी.) होविन्द्र बागेटीले बताए ।

राई र बस्नेत उपचारपछि घर फर्किएका छन् भने शाही दम्पत्तिको अवस्था गम्भीर रहेको प्रहरीले जानकारी दिएको छ ।
घटनामा कति भौतिक क्षति भयो भन्ने यकिन भइसकेको छैन ।