मोरङमा १७ थान अवैध हतियार बुझाएका छन्। गृह मन्त्रालयको निर्देशनपछि दिएको अन्तिम दिन बिहीबार विभिन्न प्रकारका हतियार जिल्ला प्रशासनमा बुझाएका हुन्।
मोरङ जिल्लामा ७ सय २३ जनाको नाममा दर्ता रहेको र म्यादभित्र २ सय १७ वटा मात्र हातहतियारको नवीकरण भएको कार्यालयका नायब सुब्बा तुलसीप्रसाद पौडेलले बताए।

२०७५ साल चैत १ गतेदेखि ३५ दिने सूचना जारी गर्दै गृहमन्त्रालयले विभिन्‍न हातहतियार बुझाउन निर्देशन गरेको थियो। सोही क्रममा मोरङमा १७ थान हतियार बुझाएको प्रमुख जिल्ला अधिकारी रमेशकुमार केसीले जानकारी दिए। जसमा भरुवा बन्दुक र २ नाले बन्दुक रहेका छन्।

मोरङमा नजिकको प्रहरी कार्यालय, जिल्ला प्रहरी कार्यालय,उर्लाबारी, बेलबारी लगायतका सुरक्षा निकायका कार्यालयमा हातहतियार बुझाएको उनको भनाइ छ।

प्रजिअ केसीका अनुसार, एकपटकलाई नेपाल सरकारले नवीकरण नगरेका र अवैध रुपमा रहेका हातहतियार बुझाउनलाई निर्देशन गरेको हो।

समयभित्र हातहतियार नबुझाएर पछि त्यस्ता हातहतियार भेटिएमा मुलुकी हातहतियार संहिता २०७२ अनुसार कार्वाही गरिने उनले स्पस्ट पारे।