जिल्लाको उत्तरी क्षेत्रमा पर्ने लालबन्दी नगरपालिका–१ नवलपुरमा अज्ञात समूहको गोली प्रहारबाट एक मजदुर घाइते भएका छन् ।

दुई जनाको समूहमा शनिबार मोटरसाइकल चढी आएका व्यक्तिले गोली प्रहार गर्दा स्थानीय ३० वर्षीय जयनाथ महतो पाखुरामा गोली लागि
घाइते भएका हुन् ।

घाइते महतोलाई स्थानीय स्वास्थ्य संस्थामा समान्य उपचार गरी थप उपचारका लागि वीरगन्ज लगिएको प्रहरीले जनाएको छ । उनी माथि गोली प्रहार गरेर दुई युवक भागेको जिल्ला प्रहरी कार्यालयले जनाएको छ । गोली प्रहारको कारण भने खुल्न सकेको छैन ।

घटनामा संलग्नहरूको खोजी तीव्र पारिएको प्रहरी नायव उपरीक्षक प्रतीत सिंह राठौरले बताए । उनले भने, ‘फरार रहेकाको खोजी जारी छ, प्रारम्भिक अनुषन्धानका क्रममा महतोलाई हत्या नै गर्न आएको जस्तो देखिन्छ ।’ गाउँमा दिउँसै गोली चल्दा त्यसक्षेत्रका स्थानीय त्रसित बनेका छन् ।