१४ औँ पश्चिम एसिया बेसबल कपमा सहभागी हुनका लागि नेकपाका सांसद एवम् अर्थ समितिका सभापति कृष्णप्रसाद दाहाल श्रीलङ्का पुगेका छन् ।

खेल क्षेत्र वा बेसबलसँग कुनै सरोकार नभएपनि अर्थ समितिका सभापति दाहाल नातामा भाई पर्ने दीपक न्यौपानेको डिजाइनमा सरकारी खर्च गर्नेगरी श्रीलङ्का पुगेका हुन् ।

सोमबारबाट श्रीलङ्कामा सुरु भएको १४ औँ पश्चिम एसिया बेसबल कपमा नेपालले सहभागिता जनाएको छ । नेपालको पहिलो खेल १६ जुलाईमा श्रीलङ्कासँग हुँदै छ ।

अर्थ समितिका सभापति दाहालको मामाको छोरा हुन् दीपक न्यौपाने । न्यौपाने नेपाल बेसबल तथा सफ्टबल एशोसिएसनका महासचिवसमेत हुन् । त्यसअघि उनी पूर्व सभासद अनन्त पौडेलका स्वकीय सचिव थिए ।

हाल दीपक न्यौपाने राष्ट्रिय सभाका सांसद रामचन्द्र राईका स्वकीय सचिव रहेका छन् । यिनै दीपकको डिजाइनमा राज्यकोषबाट ४० लाख रुपैयाँ लिने गरी करिब ३५ जनाको टोलीसहित उनीहरु श्रीलङ्का पुगेका हुन् ।

शनिवार श्रीलङ्का पुगेर उनीहरुले घुमघामसमेत सुरु गरेका छन् । आइतबार उनीहरुले श्रीलङ्काको समुद्री तट घुमेको फोटोसमेत सामाजिक सञ्जालमा पेश गरिसकेका छन् ।

अर्थ समितिका सभापति कुन उद्देश्यले किन श्रीलङ्का पुगेका हुन् भनेर सभापति दाहालका स्वकीय सचिव हरिशरण तिमल्सिनालाई सोध्दा उनले सभापति श्रीलङ्का गएको पुष्टि गरेपनि किन र कसको खर्चमा गएको हो थाहा नभएको बताए ।

उनले भने ‘सभापतिज्यू, शनिबार श्रीलङ्का जानुभएको हो । मैले सुनेअनुसार उहाँ बेसबल प्रतियोगितामा सहभागिता जनाउन जानुभएको छ । तर, भ्रमण औपचारिक हो कि अनौपचारिक हो र कसको खर्चमा कसरी जानुभएको हो त्यो चाहिँ थाहा छैन ।’

अर्थ समितिका सभापति बेसबल प्रतियोगितामा सहभागी हुनुपर्ने कुनै आधार र कारण छैन । यद्यपि उनले सभामुख कृष्ण बहादुर महरालाई मौखिक जानकारी गराई केही दिनका लागि श्रीलङ्का गएको बताएका छन् ।

बेसबल संघका महासचिव दीपक न्यौपानेले राज्यकोषबाट रकम लिने गरी उनीहरुलाई श्रीलङ्का घुमाउन लगेका हुन् ।

बेसबस संघकै लेटर प्याडमा खेलकुद परिषद्मा ४० लाख रकम माग गरी दीपकले निवेदन दिएका थिए । तर खेलकुद परिषद्मा रकम नभभएको भन्दै परिषद्ले खेलकुद मन्त्रालयलाई रकम दिलाइदिन सिफारिश गरी पठाएको छ ।

हेर्नुहोस् परिषद्ले खेलकुद मन्त्रालयलाई लेखेको पत्र ।

यता, खेलकुद मन्त्रालयमा पनि उक्त शीर्षकमा रकम नभएको भन्दै ४० लाख रकम निकाशाका लागि अर्थ मन्त्रालयलाई पत्र लेखी पठाएको छ ।

छिटो पत्र लेख्न र रकम निकासाका लागि दबाब दिन अर्थ समितिका सभापति आफै खेलकुद मन्त्रालयमा उपस्थित भएको मन्त्रालयका एक अधिकारीले रातोपाटीलाई बताए ।

खेलकुद मन्त्रालयले चलानी नम्बर २१२१ मिति २०७६ असार २२ गतेको पत्रबाट अर्थ मन्त्रालयसँग रकम निकासाका लागि सिफारिश गरी पठाएको छ । खेलकुद मन्त्रीले अर्थ मन्त्रालयमा सिफारिश गर्ने तोक आदेश दिएपछि मन्त्रालयले अर्थमा यो सिफारिश पठाएको हो ।

हेर्नुहोस् खेलकुद मन्त्रालयले अर्थ मन्त्रालयलाई पठाएको पत्र ।

असार २२ गते अर्थ मन्त्रालयमा यो पत्र दर्ता भएको छ । अर्थसचिव राजन खनाललाई दबाब दिएर अर्थ समितिका सभापति कृष्ण प्रसाद दाहालले १० लाख रकम स्वीकृत गराएको श्रोतले दाबी गरेको छ । यद्यपि अर्थ मन्त्रालयले भने यस सम्बनधमा हालसम्म कुनै निर्णय नभएको प्रतिक्रिया दिएको छ ।   स्रोत : रातोपाटी