दोर्दीखोलामा बुधबार दिउँसो आएको बाढीले बगाउँदा मृत्यु भएका ४ जनामध्ये ३ जनाको सनाखत भएको प्रहरीले बताएको छ । पुरै ठेगाना भने खुल्न बाँकी छ ।

दोर्दी गाउँपालिका ४, नौथर शेरामा भेटिएका २ जनाको शवमध्ये १ जना पर्सा जिल्लाका अन्दाजी २८/३० वर्षीय शिवधन चौधरी रहेका छन् ।

यस्तै, शेराभन्दा अलि माथि भेटिएका एकजना सप्तरी जिल्ला सप्तकोशी नगरपालिका ८ का अन्दाजी ५० वर्षीय भुवनेश्वर चौधरी रहेका छन् । कीर्तिपुर बेंसीमा भेटिएका १ जना डडेल्धुराको आलेताल गाउँपालिका ६ का अन्दाजी ३४/३५ बर्षीय रमेश बुढा रहेको जिल्ला प्रहरी कार्यालयका इन्सपेक्टर बसन्त पाण्डेले बताए ।

एकजनाको शव चिनिन सक्ने अवस्थाको नरहेको प्रहरीले बताएको छ । शवलाई पोष्टमार्टमको लागि बेंसीसहरस्थित लमजुङ जिल्ला सामुदायिक अस्पतालमा राखिएको छ ।

दोर्दीखोलाको मुहानतिर पहिरो गएर थुनिन गई एक्कासी बाढी आएको हुनसक्ने अनुमान गरिएको छ । तर, यसको कारण यही हो भनेर पत्ता लगाउन नसकिएको प्रमुख जिल्ला अधिकारी डा। डिजन भट्टराईले बताए ।