स्पेनिस ला लिगाको नयाँ सिजन आज (शुक्रबार) रातिबाट सुरुवात हुँदैछ । शुक्रबार हुने खेलमा साविक विजेता बार्सिलोनाले सिजनको पहिलो खेल खेल्दैछ । एट्लेटिको बिल्बाओको घरेलु मैदानमा हुने खेल नेपाली समय अनुशार राति १२ बजेर ४५ मिनेटबाट सुरु हुनेछ । आजको खेलमा जित निकाल्दै दुबै टोली सिजनको उत्कृष्ट सुरुवात गर्ने योजनामा छन् ।

अघिल्लो सिजन बार्सिलोनाले ८७ अंकका साथ शीर्ष स्थानमा रहँदै सिजन अन्त्य गरेको थियो । यता बिल्बाओले ५३ अंकसहित आठौं स्थानमा रहेर सिजन अन्त्य गरेको थियो । बार्सिलोनाको नयाँ सिजनको डेब्यू खेलमा कप्तान लियोनल मेस्सीले खेल्ने छैनन् । मेस्सी नेपोलीविरुद्धको खेलअघि प्रशिक्षणको क्रममा घाइते भएका थिए ।

यता बार्सिलोनाका लागि एन्टोनी ग्रिजम्यान र डी योङले क्लबका लागि घरेलु लिगगमा डेब्यू गर्नेछन् । ग्रिजम्यान ला लिगाकै एट्लेटिको मड्रिडबाट बार्सिलोनामा अनुबन्धन भएका थिए भने डी योङ आयाक्सबाट अनुबन्धन भएका थिए ।