हेटौंडा : बकैया गाउँपालिका ३ जलजलेमा धारिलो हतियारको प्रयोग गरी एकजनाको हत्या गरिएको छ। बुधबार राति बकैया गाउँपालिका ३ जलजले स्थित ‌घरमै बसिरहेकी ५० वर्षीया सन्तमाया लो लाई सोही ठाउँमा बस्ने ५० वर्षीय सुकबहादुर पाख्रिनले धारिलो हतियार प्रहार गरी घाइते बनाएका थिए। उनको उपचारको क्रममा हेटौंडास्थित चुरेहिल अस्पतालमा मृत्यु भएको प्रहरीले जनाएको छ। त्यसैगरी पाख्रिनले धारिलो हतियार प्रहार गरी २ जना गम्भीर घाइते भएका छन्। गम्भीर घाइते हुनेमा मृतकको श्रीमान ५५ वर्षीय कालबहादुर लो र स्थानीय २६ बर्षीया दिधिमाया मोक्तान रहेका छन्। उनीहरुको टाउको, निधारमा चोट रहेको र घाइते दुबैको चुरेहिल अस्पतालमा उपचार भइरहेको जिल्ला प्रहरी कार्यालय मकवानपुरका प्रहरी प्रवक्ता प्रहरी नायब उपरीक्षक यज्ञ प्रसाद भट्टराईले बताएका छन्। हत्याको कारण भने खुल्न सकेको छैन। हत्यामा संलग्न पाख्रिनलाई इलाका प्रहरी कार्यालय फापरबारीबाट गएको टोलीले हतियार सहित पक्राउ गरिसकेको र उनलाई जिल्ला प्रहरी कार्यालय मकवानपुरको हिरासतमा राखिएको र उनिमाथि थप अनुसन्धान भइरहेको भट्टराईले जानकारी दिएका छन्।