हेटौंडा: मकवानपुर प्रहरीले गोली प्रहार गरी गएराति गाँजा ल्याउदै  गरेको कार पक्राउ गरेको छ । हेटौँडा–११ थानाभर्याङमा प्रहरी चेकिङ टोलीले मनहरीबाट हेटौंडातर्फ आउँदै गरेको बीआर ०६जे ४४५८ नम्बरको कार रोकी जाँच गर्न खोजेको थियो ।

तर कार नरोकी भैरवडाँडातर्फ भाग्न खोजेपछि वडा प्रहरी कार्यालय हेटौंडाका प्रहरी निरीक्षक ईश्वरीप्रसाद भण्डारीले एक राउण्ड हवाई फायर गरेका थिए । हवाई फायर गर्दा पनि कार नरोकिएपछि टायरमा एक राउण्ड गोली प्रहार गरेपछि कार रोकिएको थियो ।

कारमा जाँच गर्दा पछाडिको सिटमा फल्स बटम बनाई १६ वटा पोकामा लुकाई राखेको ३२ किलो गाँजा बरामद भएको बुधबार भएको पत्रकार सम्मेलनमा मकवानपुरका प्रहरी उपरीक्षक सुशिलसिंह राठौरले बताए । उक्त कार मनहरी चेकपोष्ट, नेवारपानी चेकपोष्ट र लेवट चेकपोष्टमा रोक्न खोज्दा नरोकी भागेको राठौरले बताए ।

पक्राउ पर्नेमा भारत मजफपुरमा ३५ वर्षिय कार चालक संजित पासवान, कारमा सवार ३५ वर्षिय अजैमल हवारी र ४५ वर्षिया जाहेरा खातुन रहेका छन् ।

गाँजा तस्करलाई नियन्त्रणमा लिएर ल्याउने क्रममा बसको ठक्करबाट प्रहरी र गाँजा तस्करीमा संलग्न खातुन घाइते भएकी छिन् । उनको चुरेहिल हस्पिटलमा उपचार भईरहेको जिल्ला प्रहरी कार्यालय मकवानपुरले जनाएको छ ।