हेटौंडा: हेटौडामा माघको २७ गतेदेखि झमकमाया स्मृति कप अन्तर विद्यालय टि–१० क्रिकेट प्रतियोगिता हुने भएको छ । हेटौँडाको न्युज क्लब नेपालमा आयोजित पत्रकार सम्मेलनमा मदन भण्डारी स्पोर्ट एकेडेमी मकवानपुरको व्यवस्थापनमा प्रतियोगिता हुन लागेको जानकारी दिइएको हो

हेटौंडामा संचालित सोलीड्यारिटी इन्टरनेशनल एकेडेमीका संस्थापक अध्यक्ष ऋषिराम आचार्यकी आमा स्व झमकमायाको स्मृतिमा अन्तर विद्यालय टि–१० क्रिकेट प्रतियोगिता गर्न लागिएको विद्यालयका सहायक प्रध्यानाध्यापक एसके निधनले जानकारी दिनुभयो ।

हुप्राचौरमा हुने प्रतियोगितामा मकवानपुरका सामुदायिक विद्यालय र नीजि विद्यालयले सहभागिता जनाउन सक्ने छन् । प्रतियोगितामा विजेता टिमलाई नगद २० हजार र उपविजेता टिमलाई नगद १० हजार सहित मेडल, ट्रफि र प्रमाणपत्र प्रदान गरिने आयोजक सोलीड्यारिटी इन्टरनेशनल एकेडेमीले जनाएको छ ।

पत्रकार सम्मेलनमा विद्यालयका संस्थापक ऋषिराम आचार्यले विद्यालयले अभिभावक दिवसको अवसरमा पारेर एक जना पत्रकारलाई पुरस्कृत गर्ने जानकारी दिनुभयो ।

सोलीड्यारिटी पत्रकारिता पुरस्कार यसपट पत्रकार महिला सरिता दाहाललाई प्रदान गर्ने उहाँले बताउनुभयो । यसअघि वरिष्ठ पत्रकार प्रताप विष्टलाई उक्त पुरस्कार प्रदान गरिएको थियो ।

पत्रकार सम्मेलनमा स्पोर्ट एकेडेमीका केन्द्रीय सदस्य नविन सिग्देल, जिल्ला अध्यक्ष निरजसिंह ठकुरी लगायतको उपस्थिती रहेको थियो ।