मकवानपुरको बकैया गाउँपालिकाको वडा नंबर ४ को जुरेली खेल मैदानमा जारी “दोस्रो बकैया कप” फुटबल प्रतियोगिताको फाईनल खेल आज दिउँसो हुने भएको छ । बुधबार प्रतियोगिताको पहिलो सेमिफाईनल खेलमा वडा नंबर ३ ले वडा नंबर ७ लाई टाईब्रेकरमा हराउँदै फाईनल खेलका लागि स्थान बनाईसकेको छ ।

खेलको निर्धारित समयमा दुबै वडा ले १–१ गोल गरेपछि खेल टाईब्रेकरमा गएको थियो । टाईब्रेकरमा वडा नंबर ३ ले वडा नंबर ७ लाई ३–० गोल अन्तरले हरायो । खेलमा वडा नंबर ३ का गोल रक्षक बिक्रम नेगी म्यान अफ दी म्याच भए । यो जित संगै वडा नंबर ३ फाईनल प्रवेश गरेको थियो ।

यस्तै बुधबार नै भएको वडा नंबर ६ र ५ को दोस्रो सेमिफाईनल खेल रात परेपछि निर्धारित समयको खेल पुरा हुन सकेको छैन । वडा नंबर ६ को एक गोलको अग्रता रहेको छ । दोस्रो सेमिफाईनल खेलको करिब ७ मिनेटको खेल बाँकि रहेको आयोजक बकैया खेलकुद विकास समितिले जनाएको छ । बाँकि खेल केहि समयमा सुरु हुने बताईएको छ । वडा नंबर ६ र ५ को विजेताले उपाधिका लागि वडा नंबर ३ संग आजै खेल्ने छ ।

गत बुधबार ९फागुन २१० देखि सुरु भएको प्रतियोगितामा बकैया गाउँपालिका का १२ वटा वडाहरुको एक–एक टिमको सहभागिता रहेको छ । प्रतियोगिताको विजेताले नगद एक लाख सहित शिल्ड,मेडल तथा प्रमाणपत्र प्राप्त गर्ने छ भने उपविजेता टोलीले नगद ५० हजार सहित शिल्ड,मेडल तथा प्रमाणपत्र प्राप्त गर्ने जनाईएको छ । यस्तै प्रतियोगितामा विधागत उत्कृष्ट खेलाडीले नगद ५ हजार प्राप्त गर्ने बताईएको छ ।
गत वर्ष भएको पहिलो बकैया कपको उपाधि वडा नंबर ४ ले हात पारेको थियो ।