काठमाडौं । सत्तारुढ एमाले र माओवादी केन्द्रबीच भोलि विहिबार पार्टी एकता हुने भएको छ ।

बुधबार अपरान्ह बसेको एमाले स्थायी समिति बैठकमा प्रधानमन्त्री एवम् एमाले अध्यक्ष केपी शर्मा ओलीले विहिबार पार्टी एकता हुने सहमति माओवादी केन्द्रका अध्यक्ष पुष्पकमल दाहालसँग सहमति गरिएको जानकारी दिनु भएको हो । दुई पार्टीबीच बेलुकासम्म एकता हुनेगरी भोली विहान पार्टी एकता संयोजन समितिको बैठक बस्ने जानकारी पार्टी अध्यक्ष ओलीले गराउनु भएको एमाले उपाध्यक्ष बामदेव गौतमले जानकारी दिनु भयो ।

बैठकमा पार्टी एकता भोलीनै गर्ने अध्यक्ष ओली र दाहालबीचको सहमतिको स्वागत गरिएको छ । पार्टी एकता घोषणा अघि दुवै दलको केन्द्रिय कमिटी बैठकले त्यसलाई अनुमोदन गर्ने कार्यक्रम पनि तय गरिएको एमाले सचिव योगेश भट्टराईले जानकारी दिनु भयो ।

एकीकृत पार्टीको नाम नेपाल कम्युनिष्ट पार्टी हुनेछ । पार्टी एकता भएपछि ४३ सदस्यीय स्थायी समिति र २ सय ४१ सदस्यीय केन्द्रिय समिति बनाउने सहमति पनि गरिएको एमालेले जनाएको छ ।

जनता समाचारबाट