कोरोना भाइरसको संक्रमण फैलिन नदिन गरिएको लकडाउन उल्लंघन गर्ने १७ सय २८ जनालाई सोमबार प्रहरीले काठमाडौं उपत्यकाका विभिन्न ठाउँबाट नियन्त्रणमा लिएको छ ।

काठमाडौं, ललितपुर र भक्तपुरका विभिन्न ठाउँमा बिहान ६ बजेदेखि १० बजेसम्म लकडाउन उल्लंघन गर्नेलाई नियन्त्रणमा लिइएको प्रहरीले जनाएको छ ।

अत्यावश्यक काम नभई सडकमा निस्केकालाई नियन्त्रणमा लिएको महानगरीय प्रहरी आयुक्त कार्यालयले जनाएको छ ।

प्रहरीले नियन्त्रणमा लिएकामा १३ सय ४७ जना पुरुष र तीन सय ८१ जना महिला छन् ।

यसरी नियन्त्रणमा लिएकाहरूलाई तीन घन्टा सार्वजनिक स्थानमा राखेर फेरि लकडाउन उल्लंघन नगर्ने सर्तमा छोडिने प्रहरीले जनाएको छ ।

त्यस्तै लकडाउनको समयमा अत्यावश्यक सेवाबाहेक र विनापास चलेका तीन सय ७० वटा सवारीसाधनलाई ट्राफिक प्रहरीले नियन्त्रणमा लिएको छ ।
स्रोतः नयाँपत्रिका