वासिङ्टन — अमेरिकामा कोरोना भाइरस९कोभिड–१९० को संक्रमण लगातार बढिरहेको छ । जोन होप्किन्स विश्वविद्यालयका अनुसार अमेरिकामा बुधबार मात्रै थप ३३ हजार ३ सय २३ जनामा कोरोना संक्रमण भएको छ ।

त्यस्तै बुधबार एक हजार ९ सय २२ जनाको मृत्यु भएको विश्वविद्यालयले जनाएको छ । कोरोना भाइरसको संक्रमण पुष्टि भएयता अमेरिकामा एकैदिन सबैभन्दा बढी मृत्यु बुधबार भएको हो । यसअघि मंगलबार अमेरिकामा कोरोना संक्रमणबाट करिब एक हजार ८ सयको मृत्यु भएको थियो ।

बिहीबार बिहानसम्म अमेरिकामा कोरोना भाइरसको संक्रमणबाट मृत्यु हुनेको संख्या १४ हजार ८ सय १७ पुगेको छ । त्यस्तै अमेरिकामा संक्रमितको संख्या ४ लाख ३२ हजार पुगेको छ । अमेरिकाका ५० वटै राज्यमा कोरोना संक्रमण फैलिएको छ भने सबैभन्दा बढी न्युयोर्क प्रभावित भएको छ । अमेरिकाको योमिङ राज्यमा भने अहिलेसम्म कोरोना भाइरसको संक्रमणबाट कसैको मृत्यु भएको छैन ।

त्यस्तै बिहीबार बिहानसम्म कोरोना भाइरसको संक्रमणबाट इटालीमा १७ हजार ६ सय ६९, स्पेनमा १४ हजार ७ सय ९२, बेलायतमा ७ हजार १ सय ११, फ्रान्समा १० हजार ८ सय ८७, जर्मनीमा दुई हजार ३ सय ४९, इरानमा ३ हजार ९ सय ३३ र चीनमा ३ हजार ३ सय ३९ को मृत्यु भएको छ।

बिहीबार बिहानसम्म विश्वभर कोरोना भाइरसको संक्रमणबाट मृत्यु हुनेको संख्या ८८ हजार ५ सयभन्दा बढी छ। त्यस्तै १४ लाख ८४ हजारभन्दा बढी संक्रमित हुँदा करिब ३ लाख २९ हजार निको भएका छन्।
कान्तिपुर