मकवानपुर प्रहरीले चरेशसहित २ जना महिला शुक्रबार हेटौंडामा पक्राउ गरेको छ । जिल्ला प्रहरी कार्यालय र प्रहरी चौकी चौकिटोलको संयुक्त प्रहरी टोलीले यात्रुबाहक बसबाट बिरगञ्ज महानगरपालिका १६ बस्ने ५५ बर्षिया उमादेवी पटेल र ३५ बर्षिया आशादेवी पटेललाई पक्राउ गरेको हो । त्रिभुवन राजपथको पालुङ्गबाट हेटौंडा आउँदै गरेको बा ३ ख २८३१ नम्बरको बसलाई हेटौंडा १ चौकिटोलमा जाँच गर्दा कपडाको थैली बनाई कम्मर र तिघ्रामा लुकाई ल्याएको दश केजी चरेश सहित उनीहरुलाई पक्राउ गरेको जिल्ला प्रहरी कार्यालय मकवानपुरका प्रहरी नायव उपरिक्षक एवम् प्रबक्ता दीलिपराज झाले जानकारी दिए ।
साथै गुप्ताङ्गको अगाडी भागमा लुकाई ल्याएको लागुऔषधसहित एक युवक पक्राउ परेका छन् । पक्राउ पर्नेमा चितवनको राप्ती नगरपालिका ८ बस्ने ३१ बर्षिय सागर शर्मा फुयाल रहेका छन् । बिरगञ्जबाट बेनीतर्फ जाँदै गरेको ना ४ ख ७४२० नम्बरको बसलाई रोकी जाँच गर्दा डाईजेपाम १७ एम्पुल, फेनार्गन १७ एम्पुल र ब्युनोर्फिन १८ एम्पुलसहित उनी बिहीबार पक्राउ परेको प्रहरीले जनाएको छ ।