समाचार संकलनको क्रममा रहेका पत्रकारलाई दुर्व्यवहार गर्ने हेटौंडा–९ का रमेश गेलाल पक्राउ परेका छन् । किसानले युरिया मल नपाएको बिषयमा हिजो मंगलबार स्थलगत समाचार संकलनमा रहेका पत्रकार बलराम पुडासैनीलाई अपशब्द प्रयोग र हातपात गरेको आरोपमा उनी पक्राउ परेका हुन् ।

पत्रकार पुडासैनीले जिल्ला प्रहरी कार्यालयमा दर्ता गरेको किटानी जाहेरीको आधारमा उनलाई बुधबार बिहान पक्राउ गरिएको जिल्ला प्रहरी कार्यालय मकवानपुरका प्रहरी प्रवक्ता डिएसपी इन्द्रबहादुर रानाले जानकारी दिएका छन् । पत्रकारमाथिको दुव्र्यवहार भएकोमा निन्दा गर्दै नेपाल पत्रकार महासंघ जिल्ला शाखा, नेपाल प्रेस युनियन मकवानपुर र राष्ट्रिय फोटो पत्रकार समूह लगायत संचार माध्यमसँग सम्बन्धित संघ, संस्थाले प्रेस विज्ञप्ति जारी गरेका छन् ।

विज्ञप्तिमा घटनाको छानबिन गरी दोषीउपर कडाभन्दा कडा कारबाही गर्दै संचारकर्मीको सुरक्षाको माग गरिएको छ । हेटौंडाबाट सञ्चालन भइरहेको तुखबर डटकमको समाचार प्रमुख समेत रहेका पुडासैनी अन्यायमा परेको भन्दै तुखबर डटकमका सम्पादक एवम् पत्रकार महासंघ बागमती प्रदेशका सल्लाहकार गिरिजा अधिकारीले दोषीमाथि कानून बमोजिम कारबाही हुनुपर्ने र संचार क्षेत्रमाथि हुने दुव्र्यवहार रोक्न सबैले सहयोग गर्नुपर्ने आग्रह गरेका छन् ।