काठमाडौंबाट हेटौंडा फर्किने क्रममा हेटौंडाका एक व्यक्ति सडकमा रहेको ढलमा खसेर बेपत्ता भएका छन् । हेटौंडा–९ घर भएका ट्रक चालक नरबहादुर राउत भक्तपुरको सूर्यबिनायक नगरपालिका चुनदेवीमा सडकमा रहेको ढलमा खसेर बेपत्ता भएका हुन् ।

ट्रकका सहचालक रुपेश सुनारका अनुसार काठमाडौं सल्लाघारीबाट हेटौंडा फर्किने क्रममा चुनदेवी आइपुग्दा ठुलो पानी परेको र सडकको बिचमा रहेको मोटरसाइकल हटाउन जाँदा चालक राउत ढलमा खसेका हुन । दिउँसो करिब ३ बजेर २० मिनेटमा बेपत्ता भएका राउतको खोजीकार्य जारी छ । २ सय जना भन्दा बढी प्रहरीहरुले खोजी गरिरहेका सहचालक सुनारले जानकारी दिए । हेटौंडाबाट राउतका २ छोरा सहित उनकी श्रीमती घटनास्थलतर्फ गएका छन् ।

ना ६ ख १६१६ नम्बरको ट्रक चालक राउत हिजो मंगलबार दिउँसो ३ बजे शिवम् सिमेन्ट लिएर हेटौंडाबाट काठमाडौं गएका थिए । थप जानकारी आउन बाँकी रहेको छ ।