हेटौंडा–४, गर्दोईमा घरमै मृत अवस्थामा भेटिएकी सुस्मिता थापाको हत्या आशंकामा प्रहरीले अनुसन्धान गरिरहेको छ । गत मंगलबार बिहान सुस्मिताको शव भान्छामा भेटिएको थियो ।

प्रहरीले अनुसन्धानका लागि बिहिबार सुस्मिताका ससुरा ५८ वर्षीय प्रकाश थापा र नन्द २३ वर्षीया सीता थापालाई नियन्त्रणमा लिएको छ । घरमै रहेका ससुरा र नन्दले घटनाबारे थाहा नभएको भनिए पनि सुस्मिताको शव भन्छामा विभत्स अवस्थामा भेटिनुले हत्या भएको आशंकामा प्रहरीले अनुसन्धान गरिरहेको जिल्ला प्रहरी कार्यालय मकवानपुरको प्रहरी श्रोतले जनाएको छ ।

जिल्ला प्रहरी कार्यालय मकवानपुरका नायव उपरीक्षक (डीएसपी) ईन्द्रबहादुर रानाले घटना बारे अनुसन्धान भइरहेकोले मृतकका ससुरा र नन्दलाई नियन्त्रणमा लिएको बारे आधिकारिक जानकारी दिन नसकिने बताउनुभयो । घटनाको अनुसन्धानपछि पत्रकार सम्मेलन गरेर जानकारी गराइने उहाँले बताउनुभएको छ ।