बागमती प्रदेश सभाको आज शुक्रबार बसेको दोस्रो बैठकले अर्थ सम्बन्धी प्रस्तावलाई कायान्वयन गर्न बनेको विधेयक २०७७ लाई बहुमतले पारित गरेको प्रदेश सभा सचिवालयले तु खबरलाई जानकारी दिएको छ ।

आर्थिक मामिला तथा योजनामन्त्री कैलाश प्रसाद ढुंगेलले सो प्रस्तावलाई पारित गरियोस् भनी आज दिउँसो बसेको दास्रो बैठकमा टेबुल गर्नुभएको थियो ।

प्रदेश सभा सदस्यहरु सरेश नेपाल, सीता अधिकारी, सुरन्द्र राज गोर्साइँ, सृजना सैँजु, रमेश पौडेल र छिरीङ दोर्जे लामा, प्रभात तामाङ र पुकार महर्जनले टिप्पणी गर्दै सरकारले पेश्कीको रुपमा खर्च गर्ने विधेयक प्रस्तुत गर्दा कोभिड १९ मा प्रभावित जनताको उपचारमा ध्यान दिनुपर्ने र राजश्व संकलन गर्ने माहौलमा सर्वसाधारण जनतालाई बोध हुने गरी तेहेरो कर उठाउने प्रबृत्तिलाई निरुत्साहित गरी सर्वसाधारणको हितमा आर्थिक विधेयकले सेवा प्रदान गर्न आग्रह गरेका थिए ।

बागमती प्रदेश सरकारले प्रदेश सभाको छैठौँ बजेट अधिवेशन बैठक गत जेठ १२ गतेदेखि संचालन गरी पटक पटक बैठक बसेको थियो । जेठ १३ गते सरकारद्वारा नीति कार्यक्रम र गत असार १ गते आगामी आर्थिक वर्ष ०७७÷७८ को लागि सरकारको बजेट रु ५१ अर्ब ४२ करोड ७४ लाख ९४ हजारको अनुमानित बजेट आर्थिक मामिला तथा योजनामन्त्री कैलाश प्रसाद ढुंगेलले सार्वजनिक गरेका थिए ।

प्रदेश सभामा सत्तारुढ नेकपाको ८०, प्रमुख प्रतिपक्षी दल नेपाली काँग्रेसको २२, साझा विवेकशील दलको ३, नेपाल मजदुर किसान पार्टीको २ राप्रपा, राप्रपा संयुक्त गरी २ र एक स्वतन्त्र गरी कूल १ सय १० जना सांसद छन् ।

सभामुख सानुकुमार श्रेष्ठले प्रदेश सभाको बैठक अर्को सूचना जारी नभएसम्मका लागि स्थगित गरेका छन् ।