मकवानपुरमा थप एक जनामा कोरोना भाइरस (कोभिड–१९) संक्रमण पुष्टि भएको छ । हेटौडामा रहेको किटजन्य रोग तथा अनुसन्धान तालिम केन्द्र, प्रादेशिक जनस्वास्थ्य प्रयोगशालामा १३ जनाको गरिएको परिक्षणमा एक पुरुषमा कोरोना पोजेटिभ देखिएको हेटौंडा आइसोलेसन वार्डका इन्चार्ज भोला चौलागाईले जानकारी दिए ।

चौलागाईको अनुसार हेटौडा उपमहानगरपालिका वडा नं। ६ का २८ बर्षिय पुरुष रहेको बताए । ती पुरुष साउदी अरबबाट आएका थिए । उनलाई होल्डिंग सेन्टरको बसाईपछि होम क्वारेन्टाइनमा ल्याई राखिएको थियो । यसंगै हेटौंडा उपमहानगरपालिकामा कोरोना संक्रमितको संख्या ९ पुगेको छ ।

बिदेशमा रही काम गर्ने सयौ जना बैदेशिक रोजगारीको लागि गएका नेपाली कामदारका साथ नेपाल एअरलाइन्सबाट आएका हालसम्म उनमा मात्र संक्रमण पुष्टि भएको र उनको स्वास्थ्य अवस्था सामान्य रहेको इन्चार्ज चौलागाईले बताए । संक्रमित पुरुषलाई हेटौंडा–४ स्थित आइसोलेसनमा ल्याइएको छ ।

यससंगै मकवानपुरका ३६ जनामा कोरोना संकमण पुष्टि भएको छ । हाल आइसोलेसनमा ५ जना कोरोना संक्रमितहरु उपचाररत छन् भने २५ जना उपचारपछि डिस्चार्ज भएका छन् ।