भारतको दक्षिणी राज्य केरलामा निपा नामक भाइरसको संक्रमणबाट मृत्यु हुने व्यक्तिको संख्या १६ पुगेको छ । यसअघि नै १४ व्यक्तिको मृत्यु भएको र सोही संक्रमणबाट थप दुई व्यक्तिको बुधबार मृत्यु भएपछि यो संख्या १६ पुगेको अधिकारीहरुले बिहीबार जानकारी दिएका छन् ।

केरलाको कोझिकोडे मेडिकल कलेजमा ५६ वर्षीय एक पुरुष र २८ वर्षीया एक महिलाको बुधबार राति मृत्यु भएपछि यो संख्या १६ पुगेको बताइएको हो । केरलाको कोझिकोडे र मलापुरम जिल्लामा सुरु भएको यस भाइरसको प्रकोपबाट १६ व्यक्तिको मृत्यु भएको छ -यहाँका स्वास्थ्य अधिकारीले जनाएका छन् ।

साथै यस निपा भाइरसबाट ९४ जना प्रभावित भएका र अझै पनि १७ जना उपचारको क्रममा अस्पतालमा रहेका  राज्यका स्वास्थ्यमन्त्री के के शैलाजाले बताएकी छन् । भारतमा निपा भाइरसको प्रकोप फैलिएको यो तेस्रो पटक हो । यसअघि सन् २००१ मा र २००७ मा पनि भारतमा निपा भाइरसको प्रकोप फैलिएको थियो ।

त्यसबेला बङ्गलादेशको सीमा क्षेत्रमा पर्ने पश्चिम बङ्गलामा निपा भाइरसका कारण ५० जना भन्दा बढी व्यक्तिको मृत्यु भएको थियो । यो भाइरसको प्रकोप सबैभन्दा पहिला सन् १९९९ मा मलेसियाबाट सुरु भएको थियो । स्वास्थ्य क्षेत्रका अधिकारीहरुका अनुसार यस भाइरसको खोप बनेको छैन ।

यो भाइरसको संक्रमणले कडा मात्रामा ज्वरो आउने र स्वासप्रस्वासमा असर गर्ने गर्दछ । यसको संक्रमण भएपछि सघन उपचार कक्षमा राखेर स्वासप्रस्वासमा सघाउ पु¥याउनेगरी उपचार विधि सुरु गर्नुपर्छ ।