दुग्ध विकास संस्थान (डिडिसी) ले प्रति लिटर घ्यूमा ५० रुपैयाँ छुट दिने भएको छ । संस्थानको स्वर्ण जयन्तीको अवसर पारेर असार १ गतेदेखि साउन मसान्तसम्म लागू हुने गरी प्रति लिटर घ्यूमा ५० रुपैयाँ छुटको व्यवस्था गरेको हेटौंडा दुग्ध वितरण आयोजनाका प्रमुख गणेशकुमार यादवले जानकारी दिए।
गत जेठ २९ गते सञ्चालक समितिको बैठकले संस्थानको स्वर्ण जयन्तीको अवसरमा संस्थानबाट उत्पादन भई बजारीकरण हुने घ्यूको उपभोग मूल्यमा प्रति लिटर ५० रुपैयाँ छुट दिने निर्णय भएको उनले जानकारी दिए । संस्थानले बट्टा घ्यू ९ सय २० रुपैयाँ र प्लाष्टिकमा ९ सय रुपैयाँमा विक्रि गर्दै आइरहेको थियो । देशभर ४४ जिल्लामा कारोबार रहेको संस्थानको विराटनगर, धनुषाको डल्केबर, हेटौंडा, बुटवल, कोहलपुर, अतरिया, काठमाडौंको बालाजु र लैनचौरमा दुग्ध वितरण आयोजना रहेको छ ।

यसैगरी संस्थानको स्वर्ण जयन्तीको अवसरमा हेटौंडा दुग्ध वितरण आयोजनाले विविध कार्यक्रमको आयोजना गरी मनाईने संस्थान प्रमुख यादवको भनाइ रहेको छ ।