जिल्ला सभापतिको भेलाको एक दिन कांग्रेस केन्द्रीय कार्यसमितिको बैठक हेटौंडामा बस्ने भएको छ। जिल्ला सभापतिको भेलालाई व्यवस्थित र परिणामुखी बनाउनका लागि आज दिउँसो चार बजे हेटौडामा केन्द्रीय समितिको बैठक बस्न लागेको कांग्रेस प्रवक्ता विश्वप्रकाश शर्माले जानकारी दिए ।

‘मुख्य गरी विधान संसोधन गर्ने, पार्टीलाई थप व्यवस्थित बनाउँने र समसामयिक राजनीतिका विषयमा हामीले एउटा धारणा तय गर्दैछौं’ शर्माले भने, ‘केन्द्रीय समिति र जिल्लाको यो संयुक्त भेलालाई व्यवस्थित र परिणाममुखी बनाउन भन्ने विषयमा केन्द्रीय समितिले एउटा धारणा बनाउँछ ।’

निर्वाचनमा पराजय बेहोरेपछि संगठन सुधार, सदस्यतालाई व्यवस्थित र आगामी बाटो तय गर्ने सहितका विषयमा जिल्ला सभापतिहरुले केन्द्रलाई ‘फिडब्याक’ दिनेछन् । पछिल्लो समय सरकारकाका काम कारवाही लोकतान्त्रिक आचरणयुक्त नभएको भन्दै कांग्रेस सशंकित छ । सभापति भेलाले सरकारको काम कारवाहीलाई हेर्ने दृष्टिकोण पनि भेलाबाट सार्वजनिक गर्ने तयारी गरेको छ । जिल्ला सभापतिको भेला यही ५ देखि ७ असारसम्म हेटौडामा बस्दैछ । जसमा केन्द्रीय कार्यसमितिका सदस्य ७५ जिल्लाका सभापति, उससभापति र सचिव सहभागी हुनेछन् ।