२०७४ सालको माध्यमिक शिक्षा परीक्षा (एसईई) को नतिजा शनिबार सार्वजनिक भएको छ । यस वर्ष साधारण तथा प्राविधिक दुवैतर्फका विद्यार्थीको नतिजा एकै साथ प्रकाशित गरिएको छ ।

विगतका वर्षहरूमा पर्याप्त तयारी नपुग्दा साधारण तर्फका नतिजा सार्वजनिक भएको कम्तीमा एक सातापछि मात्रै प्राविधिक तर्फका विद्यार्थीको नतिजा सार्वजनिक हुँदै आएको थियो ।

नतिजालाई विगतमा जस्तै ग्रेडिङ प्रणालीबाट नौ तहमा वर्गीकरण गरेर सार्वजनिक गरिएको छ । विषयगत रूपमा ग्रेड छुट्टयाएर नतिजा सार्वजनिक गरिएका कारण विद्यार्थीको प्राप्तांकलाई ग्रेड प्वाइन्ट एभरेज (जीपीए) मा सार्वजनिक गरिएको छ ।

विद्यार्थीको प्राप्तांकलाई अधिकतम जीपीए चार तथा न्यूनतम जिरो दशमलव ८० दिइएको छ । तथ्यांक विश्लेषण गर्दा गत वर्षको तुलनामा यस वर्षको नतिजामा केही सुधार आएको छ ।

यसपटक साधारणतर्फ ग्रेड प्वाइन्ट एभरेज (जीपीए) तीन दशमलव ६५ देखि चारसम्म ल्याउने विद्यार्थी १४ हजार दुइ सय ३४ जना छन्, जसमा छात्रको संख्या आठ हजार ७० र छात्राको संख्या ६ हजार एक सय ६१ रहेको छ ।

यत्ति नै प्राप्तांक ल्याउने विद्यार्थीको संख्या गत वर्ष १२ हजार दुई सय ८४ मात्र थियो । जीपीए तीन दशमलव २५ देखि तीन दशमलव ६० ल्याउने विद्यार्थीको संख्या ४६ हजार एक सय ३० जना छन्, जसमा छात्रको संख्या २५ हजार नौ सय ४७ र छात्राको संख्या २० हजार एक सय ८३ जना थियो । गत वर्षको नतिजामा यो समूहका विद्यार्थी संख्या

४२ हजार ४ सय २७ थियो ।

जीपीए दुई दशमलव ८५ देखि तीन दशमलव २० ल्याउने विद्यार्थी ४९ हजार ३७ जना छन् । जसमा छात्रको संख्या २७ हजार ५ सय ५२ र छात्राको संख्या २१ हजार चार सय ८५ छन् । गत वर्ष यही समूहको जीपीए ल्याउने विद्यार्थी संख्या ५० हजार ६ सय ४६ थियो ।

जीपीए दुई दशमलव ४५ देखि दुई दशमलव ८० सम्म ल्याउने विद्यार्थी संख्या ७० हजार ५ सय १२ जना छन्, जसमा छात्रको संख्या ३६ हजार नौ सय ४० र छात्राको संख्या ३३ हजार ५ सय ७२ जना छन् । गत वर्ष यही समूहको नतिजा ल्याउने विद्यार्थी ६१ हजार नौ सय ५५ थियो ।

यस वर्ष जीपीए दुई दशमलव जिरो पाँचदेखि दुई दशमलव ४० ल्याउने विद्यार्थी ६१ हजार ८ सय ७० छन्, जसमा छात्रको संख्या २८ हजार नौ सय र छात्राको संख्या ३२ हजार नौ सय ७० छ । गत वर्ष यत्ति नै जीपीए ९१ हजार तीन सय १४ जना विद्यार्थीले ल्याएका थिए ।

जीपीए एक दशमलव ६५ देखि दुईसम्म ल्याउने विद्यार्थी एक लाख एक हजार ४३ छन्, जसमा छात्रको संख्या ४४ हजार ५ सय ५० र छात्राको संख्या ५६ हजार चार सय ९३ छन् । गत वर्ष यही समूहको नतिजा ल्याउने विद्यार्थी संख्या एक लाख ८ हजार चार सय ६४ थियो ।

यस वर्ष जीपीए एक दशमलव दुई पाँचदेखि एक दशमलव ६० सम्म ल्याउने विद्यार्थी संख्या ३५ हजार ५ सय ८४ छ, जसमा छात्रको संख्या १५ हजार दुई सय ६४ र छात्राको २० हजार तीन सय २० छ । गत वर्ष यही समूहको नतिजा ल्याउने विद्यार्थी संख्या ६४ हजार ५ सय ७७ थियो ।

यस वर्ष जीपीए जिरो दशमलव ८५ देखि एक दशमलव दुई जिरोसम्म ल्याउने विद्यार्थी संख्या ५८ हजार ६ सय ८८ छ, जसमा छात्रको संख्या २७ हजार एक सय ९७ र र छात्राको संख्या ३१ हजार ४ सय ९१ छ । गत वर्ष यही समूहको नतिजा ल्याउने विद्यार्थी संख्या ११ हजार दुई सय ८५ मात्र थियो ।

ग्रेडिङ प्रणालीअनुसार सबैभन्दा तल्लो स्तर मानिने जीपीए जिरोदेखि जिरो दशमलव ८० सम्म ल्याउने विद्यार्थी यसपटक शून्य रहे । गत वर्ष यो समूहका विद्यार्थी संख्या १५ जना थियो । यस वर्ष प्राविधिकतर्फ आठ हजार नौ सय ५ जना परीक्षार्थी सहभागी थिए । उनीहरूको नतिजा पनि नौ तहमै वर्गीकरण गरेर ग्रेडिङ प्रणालीमा सार्वजनिक गरिएको छ ।

आजको अन्नपूर्ण पोष्टमा खबर छ ।